BOKS: Álem chempıonatynda qazaqstandyq sportshy qyzdar top jardy
ASTANA. QazAqparat - Taıbeıde jasóspirimder men jastar arasynda bokstan ótken Álem chempıonatynda qazaqstandyq qos boksshy jeńimpaz atandy.
Qazaqstan boks federatsııasynyń saıtynan alynǵan málimetke qaraǵanda, jasóspirimder arasynda Qostanaı oblysynyń ókili Nadejda Rıabets (66 keli) fınalda amerıkandyq Kaılı Holdan basym tústi. Al Láıla Qusaıynova (63 keli) men Dına Islambekova (80 keli) qarsylastarynan utylyp, kúmis júldeni enshiledi.
Jastar arasynda Almaty oblysynan barǵan Balaýsa Muzdıman (54 keli) fınalda Eýropa chempıony ıtalıandyq Konchetta Marchezeni tize búktirdi. Ulttyq qurama kapıtany Baıan Aqbaeva (69 keli) sońǵy básekede reseılik boksshyǵa ese jiberip, kúmis júldeni qanaǵat tutty.
Munyń aldynda jeti boksshy qyzymyzdyń qola júldeger atanǵanyn eske sala keteıik.
