Boks: Álem chempıonatynda qazaqstandyq qyzdar qansha júlde alady
Álem chempıonatyna dúnıejúziniń 75 memleketinen sportshylar keledi dep kútilýde. On birinshi márte ótkizilip otyrǵan dúbirli dodada 809 bylǵary qolǵap sheberi on salmaqta synǵa túsedi.
Bokstan Qazaqstan qyzdar quramasynyń bas bapkeri Erik Alǵabek on salmaqta synǵa túsetin shákirtteriniń esimin atady. Atap aıtqanda, álem chempıonatynda elimizdiń atynan Alýa Balqybekova (48 keli), Nazym Qyzaıbaı (51 keli), Dana Jolaman (54 keli), Aıjan Qojabekova (57 keli), Rımma Volosenko (60 keli), Mılana Safronova (64 keli), Darıǵa Shákimova (69 keli), Aqerke Baqytjan (75 keli), Farıza Sholtaı (81 keli) jáne Dına Islambekova (81 keliden joǵary) sharshy alańǵa shyǵady.
Álem chempıonaty 2001 jyldan beri turaqty túrde ótkizilip keledi. Sodan beri qazaqstandyq boksshylar barlyǵy 16 júldege qol jetkizdi. Olardyń arasynda 5-ýi altyn, 4-ýi kúmis, 7-ýi qola medal. Qazaqstan quramasy 2001, 2002, 2005 jyldarda ótken jarysta júldeden tys qaldy. Al 2006 jyly Nazgúl Boranbaeva (46 keli) qola júldeger atandy. 2008 jyly Elena Koltsova (80 keli) da dál osyndaı jetistikti qaıtalady. 2010 jyly qazaqstandyq boksshylar qatarynan Marına Volnova (81 keli) kúmis alsa, Nazgúl Boranbaeva (48 keli) úzdik úshtikti túıindedi. 2012 jyly ıÝldýz Mamatkýlova (81 keli) ekinshi orynǵa turaqtasa, Nazym Qyzaıbaı (48 keli) úshinshi oryn aldy.
Sondaı-aq, 2014 jyly Qazaqstan quramasy óz tarıhynda tuńǵysh ret altyn medalge qol jetkizdi. Atap aıtqanda, 48 kelide synǵa túsetin Nazym Qyzaıbaı chempıon tuǵyryna kóterildi. Taǵy bir boksshymyz Lázzat Kúngeıbaeva (81 keliden joǵary) kúmis júldeger atandy.
2016 jylǵy álem chempıonaty Qazaqstanda ótken bolatyn. Bul joly qazaqstandyqtar 4 altyn, 2 qola medal aldy. Chempıon atanǵandar qatarynda Nazym Qyzaıbaı (48 keli), Dına Jolaman (54 keli), Valentına Halzova (69 keli), Lázzat Kúngeıbaeva (81 keliden joǵary) bar. 2018 jyly qazaqstandyq qurama qorjynyna 1 kúmis, 1 qola medal tústi. Qazaqstandyq boksshylar qatarynan Jaına Shekerbekova (51 keli) kúmis, Karına Ibragımova (60 keli) qola medal aldy.
2019 jylǵy álem chempıonatynyń oıyn kestesi tómendegishe túzilgen. Boksshylar 3-8 qazan aralyǵynda irikteý jekpe-jekterin ótkizse, 9 qazanda jarystyń 1/8 fınaldyq satysynda synǵa túsedi. Al 10 qazanda shırek fınal ótkizilse, 12 qazanda jartylaı fınal bolady. Al 13 qazanda fınaldyq jarystar ótip, jeńimpazdar anyqtalady.
Boksshylar kúndizgi jáne keshki jekpe-jekterde baq synaıdy. Álem chempıonatynda 10 medal jıyntyǵy sarapqa salynady.