Boks: Álem chempıonatyna qatysatyn qazaqstandyq sportshy qyzdar belgili boldy

NUR-SULTAN. QazAqparat - Reseıdiń Ýlan-Ýde qalasynda ótetin bokstan qyzdar arasyndaǵy álem chempıonatynda baq synaıtyn qazaqstandyq bylǵary qolǵap sheberleri belgili boldy, dep habarlaıdy QazAqparat tilshisi.

Bokstan Qazaqstan qyzdar quramasynyń bas bapkeri Erik Alǵabek on salmaqta synǵa túsetin shákirtteriniń esimin atady. Atap aıtqanda, álem chempıonatynda elimizdiń atynan Alýa Balqybekova (48 keli), Nazym Qyzaıbaı (51 keli), Dana Jolaman (54 keli), Aıjan Qojabekova (57 keli), Rımma Volosenko (60 keli), Mılana Safronova (64 keli), Darıǵa Shákimova (69 keli), Aqerke Baqytjan (75 keli), Farıza Sholtaı (81 keli) jáne Dına Islambekova (81 keliden joǵary) sharshy alańǵa shyǵady.

Qazaqstandyq boksshylar arasynda buryn álem chempıonatynda top jarǵan sportshylar bar. Máselen, Nazym Qyzaıbaı 2012 jyly qola júlde alsa, 2014, 2016 jyldarda altynnan alqa taqty. Sondaı-aq, 2016 jyly Aıjan Qojabekova úshinshi oryn aldy.

Qyzdar arasyndaǵy bokstan álem chempıonaty 2001 jyldan beri turaqty túrde ótkizilip keledi. Sodan beri qazaqstandyq qyzdar 5 altyn, 4 kúmis, 7 qola medal aldy.

Aıta keteıik, álem chempıonaty 3-13 qazan aralyǵynda ótkiziledi. Álem chempıonaty bıyl 11 márte jalaýyn kóteredi.

Foto: kfb.kz