Boks: Aqmola oblysynyń chempıondary anyqtaldy
KÓKShETAÝ. QazAqparat - Aqmola oblysynda 2002-2003 jylǵy týǵan jasóspirimder arasynda bokstan óńir chempıonaty ótti, dep habarlaıdy QazAqparat tilshisi.
Oblystyq sport basqarmasy baspasóz qyzmetiniń málimeti boıynsha, Stepnogor qalasyndaǵy sport saraıynda uıymdastyrylǵan jarysqa oblystyń ár óńirinen kelgen 100 sportshy 15 salmaq boıynsha synǵa tústi.
Jarys jeńimpazdary 19 jáne 25 qarasha aralyǵynda Ekibastuz qalasynda ótetin óńirlik birinshilikke qatysý joldamasyn jeńip aldy.
«Byltyrǵy jylmen salystyrǵanda bıylǵy jarystyń deńgeıi joǵary boldy. Ár kezdesý tartysty ótti. Qatysýshylardyń barlyǵy tek jeńis úshin kelgenin kórsetti», - dedi stýdentter arasynda álem chempıony, QR chempıony Andreı Spırıdonov.
Jarys jeńimpazdaryna arnaıy gramotalar men medaldar tapsyryldy. Oǵan qosa, jas boksshylar da marapattaldy. «Eń úzdik tehnıkasy úshin» taǵaıyndalǵan kýbok stepnogorlyq Dıas Kóshekovke berilse, «Jeńiske degen jigeri úshin» kýbogyna Jaqsy aýdanynan kelgen Erjan Qabykenov laıyq dep tanyldy.
«Jeńis úshin ǵana rıngke shyqtym. Osy jarysqa myqtap daıyndaldym. Qarsylastarym da osal bolǵan joq. Degenmen, kózdegen jeńisime qol jetkizdim», - deıdi Stepnogordaǵy Bógenbaı batyr atyndaǵy sportta daryndy balalarǵa arnalǵan oblystyq mektep ınternatynyń tárbıelenýshisi Ábilmánsur Áıdenǵalıuly.
