BOKS: 69 keli salmaq dárejesi boıynsha álemdik reıtıngte Serik Sápıev kósh basynda tur
ASTANA. 9 tamyz. QazAqparat - 69 kelide London Olımpıadasynyń chempıony Serik Sápıev kósh basynda tur. Sporttyq ǵumyryn aıaqtaǵanyna bir jyldaı bolsa da, reıtıngide Serikti eshkim qýyp jete alar emes, dep habarlaıdy alasharena.kz.
Dúnıejúzilik áýesqoı boks qaýymdastyǵy álem boksshylarynyń jańa reıtıngin jarııalady. Iordanııa astanasy Ammanda ótken Azııa chempıonatynan keıin birqatar boksshylarymyz reıtıngide joǵary kóterilgen. Al eki otandasymyz óz salmaqtarynda kósh bastap tur.
Álem chempıonaty, Olımpıada oıyndary sekildi iri dodalarda úzdik boksshylardyń bir-birimen birden birinshi kezeńde-aq kezdesip qalmaýy úshin 2009 jyldan bastap AІVA álem boksshylarynyń reıtıngin túzýdi qolǵa alǵan bolatyn. Reıtıng túzý barysynda boksshylardyń halyqaralyq týrnırlerdegi nátıjeleri eskerilip otyrady.
Qazaqstan boksshylarynyń Iordanııa astanasy Ammanda ótken Azııa chempıonatyndaǵy eren jetistikteri jerlesterimizdiń reıtıngide joǵary órleýine keremet septigin tıgizipti. Buryn reıtıngiden kórine almaı kelgen jampozdarymyzdyń birqatary upaı qoryn molaıtyp alǵan eken. Túsiniktirek bolý úshin ár salmaqqa jeke toqtalyp, jeńil salmaq dárejesinen bastaıyq.
49 kelide Temirtas Júsipov buǵan deıingi reıtıngiden kórinbegen. Azııa chempıony birden 800 upaı jınap, 6-orynǵa jaıǵasty. Birjan Jaqypov bir saty tómendep, 8-orynǵa syrǵypty. Kósh basynda - reseılik Davıd Aırapetıan.
52 kelide jaǵdaıymyz máz emes. Birde-bir boksshymyz úzdik otyzdyqtyń qatarynda joq.
Esesine, 56 kelide Qaırat Eralıev 16-orynnan kórinse, 60 kelide eki qazaq úzdik ondyqta. Ǵanı Jaılaýov bir saty kóterilip, tórtinshi orynǵa turaqtasa, Berik Ábdirahmanov 9-orynǵa jaıǵasqan.
Sol sııaqty 64 kelide buryn reıtıngiden oryn ala almaı kelgen Mereı Aqshalov birden 7-satyǵa ornalasty
Al 69 kelide London Olımpıadasynyń chempıony Serik Sápıev kósh basynda tur. Sporttyq ǵumyryn aıaqtaǵanyna bir jyldaı bolsa da, reıtıngide Serikti eshkim qýyp jete alar emes. Ekinshi orynda - ýkraınalyq Taras Shelestıýk, úshinshi orynda - ulybrıtanııalyq Freddı Ýılıams. Sondaı-aq burynǵy reıtıngilerde 64 keli salmaq dárejesiniń boksshysy retinde tanystyrylyp kelgen Danııar Eleýsinov bul joly birinshi ret 69 keliniń reıtınginen kórindi. Azııadaǵy jetistiginen keıin Danııar 4-orynǵa kóterilipti.
75 kelidegi reıtıngide de eki boksshymyz bar. Buryn úzdikter qatarynan kórine almaı kelgen Jánibek Álimhanuly Ammandaǵy alamannan keıin 7-orynǵa jaıǵassa, Danabek Sýjanov burynǵy jekpe-jekteriniń arqasynda 17-orynda tur.
Al 81 kelidegi reıtınginiń tórinde taǵy bir qazaq. Azııa birinshiliginde kúmispen kúptelgen Ádilbek Nııazymbetov 3-orynnan 1-orynǵa deıin kóterilip, reseılik Egor Mehontsev pen kýbalyq Hýlıo La Krýzdy artqa tastady.
91 kelide Anton Pınchýk 9-oryn, Vasılıı Levıt 15-satyda. Al asa aýyr salmaq dárejesiniń reıtıngisinde Ivan Dychko bir saty joǵarylap, 2-orynda tur.
