BOKS: 50 jasqa deıin álemniń absolıýtti chempıony bolǵym keledi - Bernard Hopkıns
ALMATY. QazAqparat - Jartylaı aýyr salmaqta IBF ı WBA nusqalary boıynsha álem chempıony, 49 jastaǵy amerıkalyq boksshy Bernard Hopkıns kelesi eki nusqanyń chempıondarymen kezdesýge daıyn ekendigin jetkizdi.
Olar - WBC chempıony Adonıs Stıvenson men WBO chempıony reseılik Sergeı Kovalev.
«Men kelisimshartqa birinshi bolyp qol qoıǵanymen shyǵamyn. Men osy eki jigittiń birimen jekpe-jekke shyqqym keledi. Armanym bıylǵy jyldyń sońyna deıin álemniń absolıýtti chempıony bolý», - dedi Hopkıns RingTV portalyna bergen suhbatynda.
Aıta ketelik, Bernard Hopkıns 2015 jyldyń 15 qańtarynda 50 jasqa tolady.
Ol bıyl 20 sáýirde WBA chempıony 30 jastaǵy qazaqstandyq boksshy Beıbit Shúmenovty jeńip, IBF nusqasyna osy WBA nusqasyn da qosyp alǵan bolatyn.
