Bókeıhanovtyń 150 jyldyq mereıtoıyna arnalǵan qazaq kúresi federatsııasynyń kýbogy ótedi
ASTANA. QazAqparat - Qazaqstan Respýblıkasy qazaq kúresi federatsııasy Sporttyq jekpe-jek jáne kúsh qoldanylatyn sport túrleri konfederatsııasy men Jambyl oblysy ákimdiginiń qoldaýymen, 21 jeltoqsan kúni Taraz qalasyndaǵy «Taraz-Arena» sport saraıynda Álıhan Bókeıhanovtyń 150 jyldyq mereıtoıyna oraılastyrylǵan klýbtyq komandalar arasyndaǵy Qazaqstan Respýblıkasy qazaq kúresi federatsııasynyń kýbogy ótedi.
Federatsııa kýbogyna elimiz boıynsha toǵyz klýbtyq komanda qatysady. Olardyń qatarynda qazaq kúresinen mamandandyrylǵan memlekettik jáne jeke sport klýbtary bar. Bekitilgen reglament boıynsha jarysqa 18 jasqa tolǵan balýandar 55, 60, 66, 74, 82, 90, 100 kelige deıingi jáne 100 keliden joǵary salmaq dárejeleri boıynsha klýb sapynda qatysa alady. Týrnır «betpe-bet» olımpıadalyq shemasy boıynsha ótedi.
Kýboktyń jalpy júlde qory 20 mıllıon teńgeni quraıdy. Bul elimiz boıynsha júlde qorynyń qomaqtylyǵy jaǵynan alǵashqy úshtikke kiretin joba bolyp esepteledi.
Klýbtyq komandalar arasynda ótetin týrnırde «Qazaqstan Barysy» men «Eýrazııa Barysy» týrnıri arqyly kópshilikke keńinen tanymal balýandar óz aımaǵynyń namysyn qorǵaıdy. Mysaly, Jambyl oblysynan - qazaq kúresinen Álem chempıondary Aıbol Aıtbek, Dáýlet Pahrıdenov kúsh synasady. Semeı qalasynan byltyrǵy ótken Kýbok jeńimpazdary - Aıbek Nuǵymarov, Muhıt Tursynov, Aıdos Seıpiluly syndy balýandar qatysady. Qaraǵandy oblysynan «Qazaqstan Barysy» týrnıriniń júldegerleri - Asyl Barmenov, Erjan Shynkeev te kúresedi. Astana qalasynyń «Elorda batyry» klýbynyń qatarynda Ǵanı Seıdildaev, Aıbat Seıten, Baǵdáýlet Sábıtov syndy balýandar synǵa túsedi. Almaty qalasynyń «Qazaq kuresi» klýbynan - Rýslan Ábdirazaqov («Qazaqstan Barysynyń» 2 dúrkin júldegeri), Əlem chempıony Ábzal Arystanbekov, eki dúrkin «Eýrazııa Barysy» Marat Nyǵmatullaev beldesedi.
Jarysqa myna klýbtar qatysady:
1 «Qazaq kuresi» klýby - Almaty qalasy.
2 «Elorda batyry» qazaq kúresi sport klýby - Astana qalasy.
3 «ZAK KAR» qazaq kúresi sport klýby - Qaraǵandy qalasy.
4 Qaıyrbaev atyndaǵy ulttyq jáne halyqtyq sport túrleri boıynsha sport klýby - Pavlodar qalasy.
5 Semeı qalasynyń memlekettik medıtsına ýnıversıtetiniń klýby - Semeı qalasy
6 «Tarbaǵataı» qazaq kúresi sport klýby - Shyǵys Qazaqstan oblysy.
7 Jambyl oblysynyń qazaq kúresi klýby - Taraz qalasy.
8 «Alakól» qazaq kúresi klýby - Almaty oblysy.
9. «Sapa-Arena» sporttyq klýby - Taldyqorǵan qalasy.
Birinshi oryn alǵan komanda 1 oryn - 10 000 000 (on mıllıon), ekinshi oryn 6 000 000 (alty mıllıon), úshinshi oryn 4 000 000 (tórt mıllıon) teńgege ıe bolady.
