Bókeı ordasy men Jánibek aýdandaryna jol salynady
ORAL. QazAqparat - Memleket basshysynyń tapsyrmasyna sáıkes aldaǵy jyldary Bókeı ordasy men Jánibek aýdandaryna jol salynady. Bul týraly «QazAvtoJol» UK» AQ basqarma tóraǵasynyń orynbasary Berik Jeldikbaev málim etti, dep habarlaıdy QazAqparat tilshisi.
Onyń aıtýynsha, Elbasy jýyrda BQO-ǵa jumys sapary barysynda shalǵaıdaǵy Bókeı ordasy men Jánibek aýdandaryna jol salý jóninde tapsyrma bergen bolatyn. Osyǵan oraı, QR Investıtsııalar jáne damý mınıstrligi «QazAvtoJol» UK» AQ-men birlese otyryp, jumys komıssııasyn qurdy.
Quramyna mınıstrliktiń Avtomobıl joldary komıteti, «QazAvtoJol» UK», «QazJolǴZI» AQ jáne oblys ákimdiginiń ókilderi engen komıssııa Qaztalov, Jánibek jáne Bókeı ordasy aýdandarynda bolyp, joldyń jaı-kúıimen tanysty. Batys Qazaqstan oblysynyń ákimi Altaı Kólginovpen, úsh aýdannyń basshylarymen, jergilikti turǵyndarmen kezdesýler bolyp, olardyń usynystary tyńdaldy.
Qaztalov-Jánibek-Ónege-Bısen-Saıqyn baǵytyndaǵy jalpy uzyndyǵy 300 shaqyrymdaı joldy salý úshin bıyl jobalyq-smetalyq qujattama jasalady. Kelesi jyly jol qurylysy bastalady. Ony shamamen 2021 jyly aıaqtaý kózdelýde.
Qazirgi tańda Chapaev-Qaztalov baǵytyndaǵy joldyń salynyp jatqany belgili. Qaztalov aýdany ortalyǵyna deıingi joldy «ıÝnıserv» kompanııasy 2019 jyly bitiredi.
Qurylys kezinde jol boıynda avtoturaq jáne basqa qyzmet kórsetý keshenderi salynady. Bul rette jergilikti atqarýshy organdardyń usynys-pikirleri eskeriledi.
Eń aldymen Chapaev-Qaztalov-Jánibek joldaryn salyp bitirgen kezde Reseıdiń Astrahan, Volgograd oblystaryna tikeleı shyǵýǵa bolady. Bul joldy qysqartýmen qatar kólik qozǵalysyna da tyń serpin beredi. Qazirdiń ózinde Jánibek aýdanyndaǵy Reseımen shekaradaǵy ótkizý beketiniń málimeti boıynsha kún saıyn 250-300-deı, sonyń ishinde 30-dan astam júk kólikteri ótýde.
Sonymen qatar, Bókeı ordasynda tarıhı-mýzeılik kesheni bolǵandyqtan, joldyń salynýy týrıstik klasterdiń óristeýine septesedi.
Ekinshiden, Bókeı ordasy aýdanyndaǵy Jamantaýdan qıyrshyq tas synamasy alyndy. Ol Almatydaǵy ǵylymı-zertteý ınstıtýtyna zertteýge jiberildi. Bul qıyrshyq tas qoldanýǵa qanshalyqty jaramdy, sonyń bári tolyqtaı anyqtalady. Eger ol shıkizat kózi paıdalanýǵa kelse, jol qurylysynyń baǵasy arzandap, aýdandardyń damýyna da septigin tıgizetin bolady.
-Berik Dáýletqanuly, Elbasy óńirge sapary kezinde Bókeı ordasyna týrısterdi aparý úshin de jol salýdyń mańyzdylyǵyn atap kórsetken bolatyn. Qazaqstannyń qasıetti nysandarynyń qataryna engizilgen Bókeı ordasy tarıhı-mýzeılik kesheni Han ordasy aýylynda ornalasqany belgili. Endeshe, negizgi trassadan osy aýylǵa aparatyn 22 shaqyrym joldyń taǵdyry ne bolmaq?
-Suraǵyńyz oryndy. Bul jol jergilikti atqarýshy organdardyń balansynda. Sondyqtan bul máseleni QR Investıtsııalar jáne damý mınıstrliginde kóteretin bolamyz. Árıne, bul joldy da salyp bersek, keremet bolar edi.
-Taǵy bir saýal, Jánibek aýdanynda shekaralyq ótkizý beketine deıingi jeti shaqyrym qashyqtyqqa jol salyna ma? Sondaı-aq burynnan salynyp jatqan Jánibek-Uzynkól aralyǵyndaǵy 20 shaqyrym jol she?
-Iá, ótkizý beketine jańadan jol salynady. Oǵan qosa qazirgi zaman talaptaryna saı ótkizý beketi boı kóteredi. Aldaǵy ýaqytta Reseımen eki ortadaǵy asa mańyzdy, kólik kóp ótetin jerdiń biri osy bolmaq. Bul Reseıdiń kórshiles óńirlerimen qarym-qatynasty jaqsartyp, barys-kelistiń artýyna áser etedi. Sonymen qatar Jánibek-Uzynkól aralyǵyndaǵy jol da kúrdeli jóndeledi. ıAǵnı qaıtadan salynatyn 300 shaqyrym joldyń sapasyna da aıryqsha kóńil bólinedi.
