Bókeı ordasynyń tarıhyn túgendegen úsh kitap jaryq kórdi
ORAL. KAZINFORM — Bókeı handyǵynyń qurylǵanyna 225 jyl tolýyna arnalǵan mereıtoılyq is-sharalar aıasynda Han ordasy aýylynda úsh kitaptyń tusaýy kesildi, dep habarlaıdy BQO ákiminiń baspasóz qyzmeti.
Taǵylymdy sharaǵa oblys ákimi Narıman Tóreǵalıev, eńbek ardagerleri, tarıhshy ǵalymdar, zııaly qaýym ókilderi jáne jastar qatysty.
Tusaýkeser rásiminde akademık Tuıaqbaı Rysbekovtiń «Naryn qumy — tarıhtyń shejiresi» kitabynyń ekinshi basylymy, Han ordasy mýzeı qoryǵy qyzmetkerleri jınaqtaǵan «Arhıv qujattaryndaǵy Bókeı ordasynyń tarıhy» eńbegi jáne Bókeı ordasy aýdany entsıklopedııasynyń úshinshi basylymy tanystyryldy.
«Naryn qumy — tarıhtyń shejiresi» eńbeginde Naryn óńiriniń tabıǵaty, tarıhy, eldik joly, tarıhı tulǵalary men mádenı murasy keńinen qamtylǵan. Al arhıvtik jınaqqa buryn kópshilikke belgisiz bolǵan tarıhı qujattar, resmı hattar, derekter men fotomaterıaldar engizilgen.
Bókeı ordasy aýdanynyń entsıklopedııasy tuńǵyshtar mekeniniń ótkeni men búgini, belgili tulǵalary, tarıhı oryndary, mádenıeti men áleýmettik damýy týraly júıeli anyqtamalyq derekterdi qamtıdy.
Saltanatty rásimde jańa basylymdardyń tusaýy kesilip, olardyń tarıhı tanymdy tereńdetý, Bókeı ordasynyń baı murasyn nasıhattaý jáne qundy derekterdi keler urpaqqa jetkizýdegi mańyzy atalyp ótti.
