Bókeı ordasynyń mereıtoıyna daıyndyq qalaı júrip jatyr

ASTANA. KAZINFORM – Kelesi jyly Bókeı ordasynyń qurylǵanyna 225 jyl tolady. Mereıtoıǵa daıyndyq jumystary týraly Batys Qazaqstan oblysynyń ákimi Narıman Tóreǵalıev aıtyp berdi.

– Mereıtoı daıyndyǵyna byltyrdan bastap kiristik. Bul aralyqta aýdanǵa jol salyndy. Qazir turǵyndar qıyndyqsyz, 4-5 saǵatta 600 shaqyrym jolmen oblys ortalyǵyna jete alady. Sonymen birge, aýdanda Han ordasyna deıin 21 shaqyrym jerde jol joq bolatyn. Ony da asfalttap, jańa jol saldyq, – dedi N.Tóreǵalıev elordada Ortalyq kommýnıkatsııalar qyzmetinde.

Sonymen birge, Bókeı ordasyndaǵy mektep pen Mádenıet úıi de kúrdeli jóndeýden ótkizildi. Jańa sport kesheni salyndy. Han ordasynyń ózinde vızıt-ortalyq pen ákimshilik ǵımarat boı kóterdi.

– Rekonstrýktsııany qajet etetin nysandardyń barlyǵyn kúrdeli jóndeýden ótti. Bıyl Jáńgir han jatqan kesenege de rekonstrýktsııa jasalyp jatyr, ony jaqynda aıaqtaımyz. Aýyldyń ishindegi kóshelerge de jol salynyp, jańadan elektr jaryǵy tartyldy. Jalpy, Han ordasy, Bókeıorda aýdany mereıtoıǵa tolyqtaı daıyn, – dedi Narıman Tóreǵalıev.

Ákim munda keletin týrıster sany da artqanyn atap ótti. Han ordasyna jylyna otyz myńǵa jýyq týrıst keledi. Olardyń kópshiligi – Reseıdegi qandastar jáne oblysqa túrli sharýamen keletin qonaqtar.

Buǵan deıin BQO ákimi óńirdegi tuz tapshylyǵy týraly pikir bildirgen edi.