Boqaevtyń sybaılasy kinásin moıyndap, aıǵaq berýge daıyn – sottyń kezekti otyrysy bastaldy
ALMATY. KAZINFORM – Almaty qalasynyń Almaly aýdandyq sotynda «QazTransGaz» basshysynyń burynǵy keńesshisi ári «Nur Otan» partııasynyń burynǵy ıdeology Sanjar Boqaevtyń isi boıynsha kezekti sot otyrysy bastaldy. Basty fıgýrantpen birge aıyptalýshylar oryndyǵynda onyń jıeni Madııar Qalmenov pen jeke vıdeografy Ulan Núsipqoja otyr.
Aldyńǵy sot otyrysynda Sanjar Boqaevtyń jeke mobılografy Ulan Núsipqoja urlyq, aǵashtardy zańsyz kesý jáne kórineý jalǵan aqparat taratý aıyptary boıynsha óz kinásin tolyq moıyndady. Advokatynyń aıtýynsha, aıyptalýshy sotqa óziniń áreketteri týraly ǵana emes, sonymen qatar qylmystyq is boıynsha basqa da qatysy bar adamdardyń róli týraly egjeı-tegjeıli aıǵaq berýge daıyn. Núsipqoja bul ustanymyn eki ret rastady.
Budan bólek, buǵan deıin sotta jábirlenýshi retinde jaýap bergen «QazTransGaz» AQ-nyń burynǵy zańgeri ári kásipodaq komıtetiniń hatshysy Muhtar Ámirhanov 2018 jyly «Batys Qytaı – Batys Eýropa» baǵyty boıynsha halyqaralyq avtosherý uıymdastyrýǵa arnalǵan sharttardy jasasýǵa Sanjar Boqaevtyń bastamashy bolǵanyn málimdedi.
Onyń aıtýynsha, sol kezde «QazTransGaz» AQ basshysynyń keńesshisi qyzmetin atqarǵan Boqaev kompanııanyń kásipodaq komıtetiniń otyrysyna qatysyp, jobaǵa «BM Trust» jáne «We Can» kompanııalaryn tartýdy usynǵan.
Eske sala keteıik, Sanjar Boqaev asa iri mólsherdegi alaıaqtyq, qylmystyq jolmen alynǵan kiristerdi zańdastyrý, urlyq, aǵashtardy ruqsatsyz kesý jáne kórineý jalǵan aqparat taratý baptary boıynsha aıyptalyp otyr.
Óz kezeginde Madııar Qalmenov alaıaqtyq pen zańsyz jolmen alynǵan qarajatty zańdastyrýǵa qatysty epızodtar boıynsha jaýapqa tartylyp jatyr.
Al Ulan Núsipqojaǵa urlyq, aǵashtardy zańsyz kesý men jalǵan málimetter taratýǵa qatysy bar degen aıyptar taǵylǵan.
Buǵan deıin prokýror Boqaevtyń alaıaqtyq tásilin aıtyp bergen edi. Onyń jalǵan kompanııa arqyly aqsha jymqyryp, jıhaz tsehyn ashqany da belgili boldy.
