«Boıng» ushaǵynyń apatqa ushyraýynan qaza tapqandardyń deneleri Malaızııaǵa jetkizildi
ASTANA. QazAqparat - Ýkraınanyń shyǵysynda «Boıng» ushaǵynyń apatqa ushyraýynan qaza tapqan 20 adamnyń múrdesi Kýala-Lýmpýr áýejaıyna jetkizildi. Amsterdamnan ushqan arnaıy charterlik ushaq jergilikti ýaqytpen tańǵy saǵat 10-dar shamasynda qondy, dep habarlady Bı-Bı-Sı.
Juma kúni Malaızııada ulttyq aza tutý kúni jarııalandy. Eldiń barlyq aýmaǵynda tý tómen túsirilip, bir mınýt únsizdik jarııalandy.
Malaysia Airlines áýe kompanııasynyń MH17 reısi 17 shildede Donetsk oblysynyń aýmaǵynda apatqa ushyrady. Ondaǵy 298 jolaýshy men ekıpaj músheleri qaza tapty. Ýkraınanyń shyǵysyndaǵy qaqtyǵystyń barlyq taraptary apatqa ózderiniń qatysy joq ekenin aıtýda. 20 deneniń úsheýi Amsterdamda krematsııalandy. Qaza tapqandardyń múrdesin tasymaldaǵan ushaqty kóz jumǵandardyń týystary qarsy aldy. Apatta ajal qushqandardy eske alý qurmetine Malaızııada 2 mınýtqa barlyq kólik toqtatylady. Tas joldarda júrgizýshilerdi toqtap, kólikten shyǵýlaryn suraǵan belgiler paıda bolady.
