«Boıng-787» ushaǵynyń synaqtan ótý sátin álem jurtshylyǵy tamashalady
ASTANA. Jeltoqsannyń 25-i. QazAqparat /Aıdyn Báımen/ - Tarıh qoınaýyna enip bara jatqan 2009 jyldyń sońǵy kúnderinde álemdi eleń etkizgen jańalyq boldy. Jańa zamannyń ozyq úlgidegi «Boıng-787» nemese «Drımlaıner» atalatyn ushaq áýege kóterildi,
dep habarlaıdy QazAqparat.
AQSh-tyń Vashıngton shtatyndaǵy Everett qalasyndaǵy amerıkalyq «Boıng» qurastyrý zaýytynan shyǵarylǵan ushaqtyń synaqtan ótý úshin tuńǵysh ret áýege kóterilgen sátin kóptegen sheteldik telearnalar tikeleı efırde kórsetti. Jańa úlgidegi ushaqty qurastyrý 2004 jyly bastalǵan. Bastapqyda synaqtan ótkizý 2007 jyly ótýi josparlanǵan. Biraq synaq ótkizý merzimin jetildirý máseleleri eki jylǵa uzartty. Sondyqtan osy ushaqtyń áýege kóterilý sátin álem jurtshylyǵy kópten kútken edi.
Bul birinshi qos motorly reaktıvtik jolaýshylar ushaǵy. Qazirgi ushyp júrgen «Boıng-777» ushaqtary saǵatyna 900 shaqyrymdyq jyldamdyqpen usha alatyn bolsa, al «Boıng-787» áýe kemesi saǵatyna 2040 kılometr jyldamdyqty baǵyndyrady. Bir ushqanda 15 myń shaqyrymnan astam qashyqtyqty qamtı alady. Jolaýshylar syıymdylyǵy 250-den 330 deıin. Eń bastysy, jańa ushaq ekonomıkalyq jáne ekologııalyq jaǵynan óte tıimdiligimen erekshelenedi. Ushaq qańqasynyń 50 paıyzy myqty plastıkalyq materıaldan jasalǵan. Burynǵy ushaqtarǵa qaraǵanda 15 myń bet alıýmınıı metalyn almastyrǵan. «Boıng-787» ushaǵyn jańa materıaldarmen qamtýǵa Reseı eli de atsalysqan.Bul ushaq áli bir jyl boıyn synaqtan ótpekshi. Alǵashqy ushaqtardy Japonııa almaq. Kúnshyǵys eli birneshe ushaqqa tapsyrys berip qoıǵan. Alǵashqy reısti 2011 jyly bastaýdy josparlap otyr. Úsh jyl ishinde álem elderiniń 57 avıakompanııasy 877 ushaqqa tapsyrys bergen.
Qazir Qazaq eliniń aspanynda «Boıng-777» ushaqtary ushyp júr. Aldaǵy ýaqytta jańa zamannyń «Boıng-787» ushaqtary da bizdiń eldiń jolaýshylaryn shyrqaý kókke alyp shyǵady degen senim bar.
