Bóget buzylǵanda úıinde uıyqtap qalǵan erli-zaıyptyny aman-esen alyp shyqtyq – polıtsııa qyzmetkeri
AQTÓBE. KAZINFORM - Tasqyn kezinde aýyl turǵyndaryn aman-esen qaýipsiz jerge alyp shyqqan Áıteke bı aýdandyq polıtsııa bólimi jergilikti polıtsııa qyzmetiniń ýchaskelik ınspektory Darhan Kemeltaev búgin marapattaldy. Ol naýryzda bastalǵan tasqynǵa qarsy kúres jumystarynyń qalaı júrgenin aıtyp berdi.
Aqtóbe oblysy Áıteke bı aýdandyq polıtsııa bólimi jergilikti polıtsııa qyzmetiniń ýchaskelik ınspektory Darhan Kemeltaev tótenshe jaǵdaı jarııalanbas buryn kúsheıtilgen tártipte jumys istegen. Áıteke bı aýdany Taldysaı aýyly mańyndaǵy Şerbakov bógeti qaýip tóndirgen kúnnen bastap-aq tártip saqshylarynyń jumysy adam ómirin saqtap qalýǵa baǵyttaldy. Olar aýyldyń eń qaýipti degen kóshelerin ózara bólip alyp, halyqqa túsindirý jumystaryn júrgizdi. Kóshýge keńes berip, ár úıdi aralady. Tártip saqshylarynyń eskertýin kúndelikti tirlik dep bilgen keıbir turǵyn baspanasyn tastap shyǵýǵa kelispedi. Eshkimdi kúshteýge bolmaıdy. Bul – buıryq. Alaıda polıtsııa qyzmetkerleri sol mańda kúni-túni júrip, kúzetti kúsheıtti. 29 naýryzda tańda bóget buzylyp, aýyl shetin sý basty.
«Yrǵyz ózeniniń boıynda ornalasqan kóshelerdiń bárin sý basty. Sol kezde aldyn ala eskertý aıtylǵan, biraq evakýatsııalaýǵa kónbegen adamdardyń úıin qaıta qarap shyǵýdy jón kórdik. Erli-zaıyptynyń qalyp qoıǵanyn bilip, birden sonda bardyq. Kúıeýi múgedek, al áıeli sonyń kútýshisi. Olar «biz shyqpaımyz, eshteńe bolmaıdy» dep senimdi júrdi. Sý kelgende aýlasyna kirgen eken. Al erli-zaıypty uıyqtap jatqan. Biz esik-terezesin qaǵyp, alyp shyqtyq. Tipti ıtin de ertip aldyq. Sonymen birge kóshýden bas tartqan basqa da adamdarǵa bardyq. Sý ekpini kúshti, tipti úılerdi qulatyp ketken sátterin kórdik. Meniń janymda áriptesim Aıbek Altynbaev boldy», - dedi Áıteke bı aýdandyq polıtsııa bólimi jergilikti polıtsııa qyzmetiniń ýchaskelik ınspektory Darhan Kemeltaev.
Polıtsııa qyzmetkerleri adamdarmen birge mal aıdap, qaýipsiz jerge baǵyttaýdy da óz mindetine alǵan. Sonymen birge aýyl turǵyndaryn kóshirgen soń urlyq-qarlyq, tonaý derekteriniń aldyn alý úshin baqylaýdy kúsheıtti.
«Biz úshin adamnyń amandyǵy mańyzdy boldy. Bári de aman-esen. Búgin Prezıdent Qasym-Jomart Toqaevtyń qolynan «Erligi úshin» medalin aldym. Qýanyshym qoınyma syımaı júr. Bul – meniń birinshi marapatym», - dedi Darhan Kemeltaev.
Aıta keteıik, Darhan Kemeltaev 2013 jyldan bastap quqyq qorǵaý salasynda jumys isteıdi. Al Áıteke bı aýdandyq polıtsııa bólimi jergilikti polıtsııa qyzmetiniń ýchaskelik ınspektory qyzmetin atqaryp júrgenine úsh jyl toldy.
