Bóget buzyldy: Sabyndy aýylyn sý basý qaýpi tolyqtaı joıyldy
ASTANA. KAZINFORM – Qazirgi ýaqytta jaqyn mańdaǵy eldi meken — Sabyndy aýylyn sý basý qaýpi tolyqtaı joıyldy, barlyq nysandar qalypty rejımde jumys istep tur.
Aqmola oblysynyń Qorǵaljyn aýdanynda erigen qar sýynyń kelýine baılanysty Shóptikól bógeti buzyldy. Oqıǵa ornynda oblys ákimi Marat Ahmetjanov pen Tótenshe jaǵdaılardyń aldyn alý komıtetiniń tóraǵasy Serik Júnisbekov bar. Oblys ákiminiń orynbasary Murat Balpannyń jetekshiligimen jedel shtab quryldy.
Qazirgi ýaqytta jaqyn mańdaǵy eldi meken — Sabyndy aýylyn sý basý qaýpi tolyqtaı joıyldy, barlyq nysandar qalypty rejımde jumys istep tur. Jergilikti atqarýshy organdar, TJM kúshteri jáne turǵyndardyń qatysýymen Astana — Qorǵaljyn respýblıkalyq avtojolynyń jol jamylǵysynyń deńgeıin kóterý arqyly erigen sýdy dala aımaǵyna burý jumystary júrgizilip jatyr.
— Saldaryn joıý jumystaryna 56 tehnıka jáne 230-dan astam jergilikti turǵyn men TJM jeke quramy jumyldyryldy. 5 myń qap jáne 50 myń tonna ınertti materıal daıyndaldy, 800 metr jer úıindisi tóseldi. Jaǵdaı tıisti qyzmetterdiń baqylaýynda, — delingen habarlamada.
Aıta keteıik, Shóptikól bógetiniń syıymdylyǵy 4,71 mln tekshe metr, sý aıdynynyń aýmaǵy 157 gektar, ortasha tereńdigi shamamen 3 metr. Nysan Astana — Qorǵaljyn respýblıkalyq avtojolynyń bir bóligin sý basýdan qorǵaıdy, sondaı-aq Shevchenko jáne Balqash toǵandaryn sýmen qamtamasyz etedi.
Aıta ketelik Aqmola oblysynda «Shoptykól» bógeti buzylǵan edi. Sol sebepti Astana–Qorǵaljyń jolynda tasqyn sýǵa qarsy qorǵanys kúsheıtildi.
