Bógde adamnyń qolynda bolǵan Dosjan ıshannyń móri mýzeıge tapsyrylady
Aqtóbe oblysy, Temir aýdanynyń turǵyny buǵan deıin mórdi 1 mıllıon teńgege baǵalaǵan bolatyn. Aýdan ákimi Joldas Qalmaǵanbetov mór Shubarqudyq turǵynynan Dosjan ıshan urpaǵyna berilgenin, urpaǵy ony mýzeıge tapsyratynyn habarlady.
«Árqıly sebeptermen jeke adamnyń qolynda saqtalǵan Dosjan Hazirettiń móri zańdy murageri, atanyń shópshegi Asqar Habıbýllınniń qolyna tıdi. Asqar baýyrymyz Haziretten qalǵan Quran kitaby men mórdi oblystyq mýzeıge tapsyrýdy maqsat etip otyr. Mórde arabsha: «Allaǵa qulshylyq etýshi molla Dosmýhammad ıbn Qashaq 1248» (Hıjra jyl esebimen) dep jazylǵan. Qasıetti jádigerdiń el ıgiligine aınalatyndyǵyna qýanyshtymyn. Babanyń murasyn izdegen baýyrymyz Asqarǵa, sonshama jyl muqııat saqtaǵan Shubarqudyqtyń turǵynyna shynaıy alǵysymdy bildiremin», - dep jazdy aýdan ákimi J.Qalmaǵanbetov.
Aıta keteıik, aýdandaǵy Dosjan ıshan meshiti qaıta qalpyna keltiriledi. Bul jumys keler jyly aıaqtalady. Sonymen qatar Haziret urpaqtary bulaq kózin ashyp, el ıgiligine paıdalanýǵa berip qoıǵan.
«Bul mór aýyl turǵynynyń qolynda 10 jylǵa jýyq ýaqyt saqtaldy. Biz izdep, jan-jaqtan surap, saqtaýshyny taptyq. Kóp qarjy surady, biraq ortaq kelisimge keldik. Búgin tańerteń kelip, alyp, alǵysymyzdy bildirdik. Ózimizde https://izbasar.kz/ portaly bar. Tek Dosjan Hazirettiń emes, Aqtóbe oblysyndaǵy ıshandardy, iri tulǵalardy qosamyz. Qazir ózimizde atamyz ustaǵan Quran kárim bar. Portalda elektrondy nusqasy tur. Dosjan ıshan qorymynda ashyq aspan astyndaǵy mýzeı bolady. Keler jyly jumys aıaqtalǵan soń mór men kitapty mýzeıge tapsyramyn. Qundy jádigerdi tek bir otbasy emes, óskeleń urpaq kórip, bilip ósýi tıis», - dedi Dosjan ıshan urpaǵy Asqar Habıbýllın.
Dosjan ıshannyń eki móri bolǵan. Biri tós móri, ekinshisi qol móri. Qol móri tabylmady.
