Bogdana Matsotska: Men «Shymbulaqta» ózimdi týǵan úıimdegideı sezindim
ALMATY. QazAqparat - Men «Shymbulaqta» ózimdi týǵan úıimdegideı sezindim. QazAqparat tilshisine bergen suhbatynda «Kúmis Eńlikgúl» Halyqaralyq týrnıriniń tórt dúrkin jeńimpazy ýkraınalyq taýshańǵyshy Bogdana Matsotska osylaı dedi.
Onyń aıtýynsha mundaı sezim jeńiske jetýde sportshy úshin psıhologııalyq turǵyda óte mańyzdy.
«Mysaly men Eýropa elderinde talaı jarystarǵa qatysyp júrmin. Sonda keıbir elderde uıymdastyrýshylar tarapynan qandaı da bir enjarlyqty, selqostyqty baıqaısyń. Olardyń sportshylarǵa degen kózqarasy: «Biz uıymdastyrýshylarmyz, jarysty biz ótkizip jatyrmyz. Bizdiń isteıtin tirligimiz mynaý. Al senderdiń isteıtin tirlikteriń mynaý. Jarysý senderdiń óz sharýalaryń», - degendeı áser qaldyrady. Al munda múldem basqasha. Adamdar seniń kelgenińe, jarysqa qatysyp jatqanyńa dán rıza. Jeńisińe shyn qýanady, kómek qajet bolsa qasyńnan tabyla ketedi. Mundaı qarym-qatynastan keıin, árıne, ózińdi týǵan úıińdegideı sezinesiń. Maıda-shúıde tirlikterge oıyń bólinbeıdi. Jarysqa qulshyna kirisesiń. Bul, sportshy úshin óte mańyzdy faktor. Sondyqtan uıymdastyrýshylarǵa shyn júrekten alǵysymdy bildiremin - dedi B. Matsotska.
Aıta ketelik, Bogdana «Shymbulaq» taý-shańǵy shıpajaıynda taý shańǵysy sporty boıynsha ótken halyqaralyq týrnırdiń naǵyz qaharmanyna aınaldy. Ol taý-shańǵy sportynyń barlyq tórt túri: slalom, alyp slalom, sýper alyp slalom jáne sýper-kombınatsııa boıynsha ótken jarystarda aldyna jan salmady. Jeńis tuǵyryna tórt ret kóterildi. Sonyń arqasynda Ýkraına qurama komandasy jalpy komandalyq esepte birinshi oryndy jeńip aldy. Al qazaqstandyqtar ekinshi oryndy ıelendi. Jerlesterimiz eki altyn, úsh kúmis jáne bes qola medalǵa qol jetkizdi. Qazaqstan qurama komandasynyń kóshbasshysy Igor Zakýrdaev sýper-kombınatsııadan jeńimpaz atansa, sýper alyp slalomnan taǵy bir jerlesimiz Taras Pımenov birinshi oryndy ıelendi. Al Frantsııa quramasy jalpy komandalyq esepte úshinshi orynǵa turaqtady. Frantsýzdar Benýa Jagonyń arqasynda alyp slalom men slalomnan birinshi oryndy ıelendi.
Aıtpaqshy, QazAqparat tilshisiniń «Matsotska» degen qandaı maǵynany bildiredi?» - degen suraǵyna Bogdana: Ýkraınsha dálirek Matsotska - «Kishkentaı» degen maǵynany bildiredi», - dep jymııa jaýap berdi.
