Bogdan Verbovoı: Polsha sahnasynda ózimdi ǵana emes, qazaq balet mektebin de tanystyryp júrmin
ALMATY. KAZINFORM – Qazaq balet óneriniń taǵy bir ókili Bogdan Verbovoı halyqaralyq deńgeıde moıyndalyp, Eýropa sahnasynda óner kórsetip júr. Býdapeshttegi bedeldi baıqaýda top jaryp, Polsha ulttyq teatryna shaqyrtý alǵan ártis búginde jańa ortada kásibı turǵydan da, tulǵalyq jaǵynan da ósip kele jatqanyn aıtady.
– Bogdan, Polsha ulttyq baletinen shaqyrtý alǵan sát esińizde me? Sheteldik teatr ujymyna qalaı qosyldyńyz?
– Men Budapest Ballet Grand Prix baıqaýynan keıin Polsha ulttyq teatry tarapynan shaqyrtý aldym. Bul baıqaýda altyn medal jeńip aldym. Qazylar alqasynyń quramynda teatrdyń balet trýppasynyń kórkemdik jetekshisi Kshıshtof Pastor boldy.
Nátıjeler jarııalanǵannan keıin qazylarmen qysqasha tildesýge múmkindik týǵan edi. Sol kezde Kshıshtof Pastor maǵan ózi kelip, qaıda óner kórsetip júrgenimdi surady. Áńgime barysynda óz trýppasyna birinshi solıst retinde qosylý múmkindigin usyndy.
– Qazaqstannan Eýropa sahnasyna ótý – tek geografııa emes, ishki transformatsııa da shyǵar. Ózińizdi kásibı turǵyda jáne jeke adam retinde qalaı ózgertip jatyr?
– Ázirshe naqty qorytyndy jasaýǵa erte, biraq ózgeristerdiń bar ekenin anyq sezemin. Kásibı turǵydan jańa deńgeıge kóterilip kelemin. Jańa qoıylymdar, jańa horeografııalyq baǵyttar – munyń bári meniń damýyma úlken serpin berip jatyr.
Al tulǵalyq turǵydan ózime degen senimim artty. Sebebi men tek ózimdi emes, elimdi, qazaq balet mektebin tanystyryp júrgenimdi jaqsy túsinemin. Bul – úlken jaýapkershilik. Dál sol jaýapkershilik maǵan qosymsha kúsh pen motıvatsııa beredi.
– Polish National Ballet trýppasyndaǵy shyǵarmashylyq atmosferany qalaı sıpattar edińiz? Bul teatrdyń basty ereksheligi nede dep oılaısyz?
– Balet trýppasyndaǵy shyǵarmashylyq orta óte kásibı ári jumysqa tolyq baǵyttalǵan. Ár ártis óz isine barynsha jaýapkershilikpen qarap, qoıylymdy basynan aıaǵyna deıin minsiz oryndaýǵa tyrysady, tipti keıde talaptan da asyp túsedi.
Osyndaı ortada jumys isteý meni shabyttandyryp, ózimdi únemi damytýǵa ıtermeleıdi. Degenmen ázirshe qandaı da bir erekshe aıyrmashylyqty naqty atap ótý qıyn, sebebi munda jumys istep júrgenime nebári jarty jyl ǵana boldy.
– Teatr repertýary klassıka men zamanaýı baǵytty qalaı úılestiredi? Sizge qaı baǵyt jaqyn?
– Teatr qazirgi zaman talaptaryna saı keledi. Repertýarynda zamanaýı jáne neoklassıkalyq qoıylymdar mol, sonymen qatar klassıkalyq balet murasy da óz ornyn saqtap otyr.
Óz basyma klassıkalyq baǵyt jaqynyraq, óıtkeni Abaı atyndaǵy qazaq ulttyq opera jáne balet teatry sahnasynda kóbine sol repertýarmen jumys istedim. Degenmen jańa horeografııalyq baǵyttar da qyzyqtyrady. Sol arqyly ózimdi jan-jaqty ártis retinde damytqym keledi.
– Qandaı spektaklderde qaı partııalardy oryndap úlgerdińiz?
– Osy ýaqytqa deıin birneshe qoıylymda óner kórsetip úlgerdim. Atap aıtsam, «Sımfonııa Do» baletiniń І jáne ІІІ aktilerinde bas partııany bıledim, «Jetinshi sımfonııa» qoıylymynda solıst retinde shyqtym. Sonymen qatar «Pınokkıo» baletinde Pınokkıo rólin, «Kılar kontserti» qoıylymynda solıst partııasyn oryndadym.
Qazir «Baıaderka» baletindegi Solor partııasynyń premerasyna daıyndalyp jatyrmyn. Budan bólek, shaqyrtý boıynsha «Jızel» baletinde Albert partııasyn Latvııa ulttyq teatrynyń sahnasynda bılep qaıttym.
– Eýropalyq jáne qazaqstandyq kórermenniń qabyldaýy arasynda aıyrmashylyq bar ma? Qaı sahnada jaýapkershilik kóbirek seziledi?
– Negizi jaýapkershilik qaı jerde óner kórsetseń de birdeı seziledi. Kórermender barlyq jerde baletti jaqsy kóredi, óte jyly qabyldaıdy.
Degenmen keıbir aıyrmashylyqtar baıqalady. Mysaly, Eýropada kórermender gúldi ártiske tikeleı bermeıdi, ony teatr qyzmetkerleri spektakl aıaqtalǵan soń sahnaǵa alyp shyǵady. Sonymen qatar qoıylym kezinde vıdeoǵa túsirýge qatań tyıym salynǵan, ári kórermender bul talapty buljytpaı oryndaıdy.
– Shetelde júrip, ózińizdi Qazaqstannyń mádenı ókili retinde sezinesiz be?
– Árıne, meniń qazaqy bolmysym árdaıym menimen birge júredi. Bul boıyma týǵannan sińgen qasıet. Tipti keıbir qazaq dástúrlerin osyndaǵy áriptesterime aıtyp otyramyn. Al sahnadaǵy kórinisi, bálkim, syrt kózge anyq baıqalar, sondyqtan ony naqty baǵalaý qıyn.
– Áńgimeńizge raqmet!
Eske salaıyq, buǵan deıin Danııa Koroldigi teatrynda óner kórsetip júrgen qazaq bıshisi Meırambek Nazarǵojaevpen áńgimelesken edik.
Ol áýeli Kopengagen trıbýnasynda almatylyq «Qaırat» fýtbol klýbyna jankúıer bolyp, jarty saǵattan keıin sahnada áıgili «Şelkýnchık» spektaklinde Hanzadanyń partııasyn bılegen edi.
