Bogatyr-Kómir kásipornyna jańanyń ornyna eski bólshek jetkizip kelgen kúdikti ₸830 mln jymqyrǵan

PAVLODAR. QazAqparat - Pavlodar oblysynda kapıtalynyń 50% «Samuryq-Qazyna» qoryna tıesili kómir óndirý kásipornyndaǵy jymqyrý shemasy áshkere boldy, dep habarlaıdy QazAqparat.

Bul faktini QMA Pavlodar oblysy boıynsha departamenti «Bogatyr-Kómir» JShS-men birlesip anyqtady.

Kúdikti 2020-2022 jyldar aralyǵynda «Bogatyr-Kómir» JShS qabyldaý komıssııasymen aldyn ala sóz baılasý arqyly júıeli túrde seriktestiktiń qarajatyn jymqyrǵan.

Shema bylaı - jalpy somasy 830 mln teńgeni quraıtyn jańa bólshekterdiń ornyna aıtarlyqtaı tozǵan paıdalanylǵan qosalqy bólshekter jetkizilgen.

Bul áreket memleketke asa iri kólemde materıaldyq zalal keltirgen. Kúdikti úıqamaqqa alyndy.

Atalǵan fakti boıynsha sotqa deıingi tergeý amaldary júrip jatyr. Tergeý múddesindegi basqa aqparat jarııa etilmeıdi.