«Bogatyr Kómir» kompanııasynda er adam bıikten qulap, aýyr jaraqat aldy

PAVLODAR. KAZINFORM - Oqıǵa 2 tamyz kúni kómir kenishi aýmaǵynda bolǵan.

Ekibastuzdaǵy «Bogatyr Kómir» JShS-nyń aýmaǵynda 1993 jylǵy qyzmetker jumys ýaqytynda joǵary kerneýli elektr baǵandarynda jóndeý júrgizý kezinde bıikten qulaǵan. Zardap shegýshi oqıǵa saldarynan aýyr jaraqat alyp, jedel járdemmen aýrýhanaǵa jetkizilgen.

- Jazataıym oqıǵa 2 tamyz kúni tirkeldi. Zardap shekken adam «Bogatyr Kómirde» jabdyqtarǵa qyzmet kórsetý jáne jóndeý boıynsha elektrshi-slesar bolyp eńbek etken. Bizdiń basqarma atalǵan jazataıym oqıǵa boıynsha qazir tergeý is-sharalaryn bastady. Alǵashqy túsken aqparattar boıynsha, ol jumysyn aıaqtap bıikten túsip kele jatqanda qulaǵan. Medıtsına qyzmetkerleriniń málimetinshe, ol aýyr jaraqattanǵan, jaǵdaıy aýyr. Oqıǵanyń tolyǵyraq mán-jaıy tergeý aıaqtalǵan soń ǵana belgili bolady. Er azamattyń otbasy bar,-dep habarlady Memlekettik eńbek ınspektsııasy komıtetiniń Pavlodar oblysy boıynsha departamenti basshysynyń orynbasary Abylaı Sabyrov.

Óńirlik polıtsııa departamentiniń baspasóz qyzmeti jazataıym óndiristik oqıǵany tirkedi. Eńbek ınspektsııasy júrgizip jatqan tergeý is-sharalary polıtsııaǵa beriledi. Eger oqıǵa jumys berýshiniń kinásinen bolǵany anyqtalsa, qylmystyq is qozǵalýy yqtımal.

Oblystyq densaýlyq saqtaý basqarmasy shuǵyl túrde naýqastyń bas mıyna ota jasalǵanyn, bas súıeginiń ishindegi gematomalar alynyp tastalǵanyn habarlady.

- Naýqastyń jalpy jaǵdaıy qazirgi sátte asa aýyr dep baǵalanady. Ashyq bas-mı jaraqaty, mı soǵylýy jáne aıqyn jalpy mı sımptomatıkasy dıagnozy qoıyldy. Jaǵdaıynyń aýyrlyǵy jasalǵan ota kólemi men sıpatyna da baılanysty. Naýqas ókpeni jasandy demaldyrý apparatyna qosylǵan, gemodınamıkasy turaqsyz, vazopressorlyq qoldaý kórsetilýde,-dedi óńirlik densaýlyq saqtaý basqarmasynyń baspasóz hatshysy Maqpal Qarjaýbaı.

Buǵan deıin «Bogatyr Kómir» kompanııasy bıýdjetke 777 mln teńge salyq tólemegeni týraly jazǵanbyz.