«Bogatyr Komır» JShS kompanııasy tabys salyǵyn zańsyz kemitip, 5% ǵana tólep kelgen

PAVLODAR. KAZINFORM – Oblystyq Memlekettik kirister departamenti júrgizgen tekseris nátıjesinde «Bogatyr Komır» JShS kompanııasy zańsyz túrde korporatıvtik tabys salyǵyn 15% ornyna 5% mólsherinde tólep kelgeni anyqtaldy. Bul týraly oblystyq prokýratýra málim etti.

— Tekserý nátıjesinde kásiporynǵa 777 mln teńge qosymsha salyq tóleý týraly habarlama berildi. Departamenttiń sheshimimen kelispeı, Seriktestik salyq organynyń sheshimine ákimshilik sotqa shaǵymdandy, nátıjesinde ol habarlamanyń kúshin joıdy, — delingen habarlamada.

Alaıda, prokýratýranyń apellıatsııalyq ótinishi boıynsha Pavlodar oblystyq soty salyq esepteý týraly habarlamany zańdy dep tanydy.

Sottyń sheshimi zańdy kúshine engen joq. 

Eske sala keteıik, buǵan deıin Astana qalasynda túrli kompanııalarǵa jalǵan qarjylyq qujat jasap berip, memleket bıýdjetine 1,6 mıllıard teńge kóleminde salyq tólemeýge jol ashyp bergen 10 tulǵaǵa sot úkimi shyqqanyn jazǵan edik.