Boeing kompanııasy «737 Max 8» jáne «Max 9» áýe kemelerin ushyrýdy toqtatty
ASTANA. QazAqparat - AQSh Boeing 737 Max 8 jáne Max 9 áýe kemeleriniń ushýlaryn toqtatýdy usyndy. Bul týraly QR Indýstrııa jáne ınfraqurylymdyq damý mınıstrligi Azamattyq avıatsııa komıtetinen málim etti, dep habarlaıdy QazAqparat.
«AQSh Boeing 737 Max 8 jáne Max 9 áýe kemeleriniń ushýlaryn toqtatty. Boeing kompanııasy osy tıptegi álemdegi 371 ushaqtyń paıdalanýyn toqtatý týraly usynys bildirdi», - delingen Komıtettiń Feısbýktegi paraqshasynda jarııalanǵan aqparatta.
Mundaı aqparat Boeing kompanııasynyń saıtynda da jarııa etildi.
«Boeing 737 MAX qaýipsizdigine áli de túbegeıli senimdimiz. Degenmen, AQSh Federaldy azamattyq avıatsııa basqarmasymen (FAA), AQSh Kóliktegi qaýipsizdik jónindegi ulttyq keńespen (NTSB), búkil álemdegi avıatsııalyq basshylyqpen jáne olardyń kılentterimen keńeskennen keıin saqtyq maqsatynda ári jolaýshylardy ushaqtarymyzdyń qaýipsizdigine sendirý úshin atalǵan úlgidegi ushaqtardyń ushýyn toqtattyq», - dedi Boeing kompanııasy
Eske sala keteıik, Efıopııada Ethiopian Airlines áýe kompanııasynyń Naırobıge bara jatqan ushaǵy apatqa ushyraǵandyǵy týraly buǵan deıin habarlaǵan bolatynbyz. Sondaı-aq, ushaqta BUU 19 qyzmetkeri bolǵan.
Qaıǵyly jaǵdaıǵa baılanysty Qazaqstan Prezıdenti Nursultan Nazarbaev Efıopııa Federatıvtik Demokratııalyq Respýblıkasynyń Prezıdenti Sahle-Vork Zeýdege kóńil aıtý jedelhatyn joldady.
Qazirgi ýaqytta Eýropalyq Odaq aýmaǵynda Boeing 737 MAH ushaǵyn paıdalanýǵa da tyıym saldy. Qazaqstanda «SKAT» áýe kompanııasynyń Boeing 737 MAX ushaǵyn paıdalýdy ýaqytsha toqtatty.
