Boeing kompanııasynyń toǵyz aıdaǵy shyǵyny 551 mln dollarǵa deıin azaıdy
ASTANA. KAZINFORM – Amerıkalyq Boeing kompanııasynyń 2026 jyldyń alǵashqy toǵyz aıyndaǵy taza shyǵyny 551 mln dollarǵa deıin qysqardy. Bul týraly kompanııanyń resmı saıtynda habarlandy.
Kompanııanyń ótken jyldyń osy kezeńindegi taza shyǵyny 5,98 mlrd dollar bolǵan. Al 2026 jyldyń úshinshi toqsanyndaǵy shyǵyn 5,34 mlrd dollardan 116 mln dollarǵa deıin azaıdy.
Qańtar-qyrkúıek aılarynda Boeing kirisi ótken jylmen salystyrǵanda 8%-ǵa ósip, 70,97 mlrd dollarǵa jetti. Úshinshi toqsandaǵy kiris 4%-ǵa artyp, 24,19 mlrd dollar boldy.
Kompanııanyń operatsııalyq aqsha aǵyny toǵyz aıda 2,68 mlrd dollarǵa jetti. Byltyr osy kezeńde 266 mln dollar shyǵyn tirkelgen edi.
Boeing tapsyrystarynyń jalpy quny rekordtyq 745,4 mlrd dollarǵa jetti. Úshinshi toqsanda kompanııa 161 kommertsııalyq ushaq jetkizdi.
Qorǵanys, ǵarysh jáne qaýipsizdik bólimshesiniń kirisi 15%-ǵa ósip, 7,94 mlrd dollar boldy. Onyń operatsııalyq paıdasy 492 mln dollarǵa jetti.
Kompanııa 737-7 ushaǵyna úlgilik sertıfıkattyń jańartylǵan nusqasyn alǵanyn, al 737-10 ushaǵyn sertıfıkattaý qazanda aıaqtalǵanyn habarlady. 777X ushaǵyn alǵashqy jetkizý 2027 jylǵa josparlanǵan.
Shyǵyn azaıǵanymen, Boeing áli de taza shyǵynmen jumys istep otyr. Úshinshi toqsannyń sońynda kompanııanyń qolma-qol aqshasy men ótimdi baǵaly qaǵazdary 20,7 mlrd dollardy, al jalpy qaryzy 45,9 mlrd dollardy qurady.
Aıta keteıik, Airbus amerıkalyq Boeing-ten kem qalmaý úshin bankten rekordtyq somada nesıe alǵaly otyrǵanyn jazdyq.
