Boeing apaty: Úndistan ushqysh sýıtsıd jasady degen nusqany joqqa shyǵardy

ASTANA. KAZINFORM — Úndistanda apatqa ushyraǵan Boeing ushaǵynyń ushqyshy ózine qol jumsady degen nusqa teriske shyǵaryldy, dep jazady TASS.

Úndistan kommertsııalyq ushqyshtar qaýymdastyǵy (ICPA) 12 maýsym kúni Ahmedabad qalasy mańynda apatqa ushyraǵan Air India áýe kompanııasynyń Boeing 787 Dreamliner ushaǵynyń ekıpajyn qorǵap, ushqyshtardyń kinási jóninde aldyn ala tujyrymdar jasaýǵa, sondaı-aq olardyń biri ózine qol jumsaýy múmkin degen boljamdarǵa jol bermeýge shaqyrdy. Bul týraly qaýymdastyqtyń resmı málimdemesinde aıtylǵan.

Uıym málimdegendeı, ushaqty basqarǵan ushqyshtar óte kúrdeli jaǵdaıda óz mindetterin oryndaǵan.

— Biz buqaralyq aqparat quraldary men sarapshylardy sabyr saqtaýǵa, tergeý barysyna qurmetpen qaraýǵa jáne qaıtys bolǵan ekıpaj múshelerine qatysty qurmet pen janashyrlyq tanytýǵa shaqyramyz. Air India reısiniń ekıpajy kásibı biliktilikke saı áreket etti. Olar qurmetke laıyq, al negizsiz joramaldarǵa súıengen jala jabýlar orynsyz, — delingen qaýymdastyq málimdemesinde.

ICPA BAQ-ta jarııalanǵan «ushqyshtardyń abaısyz áreketi nemese ádeıi jasaǵan is-áreketi» týraly boljamdardy «negizsiz, qaýipti jáne merziminen buryn aıtylǵan» dep atady.

Sondaı-aq, qaýymdastyq ushqyshtar turaqty túrde qatań psıhologııalyq jáne kásibı tekseristen ótetinin eske salyp, apatqa qatysty tergeýdiń resmı qorytyndysyn kútýdi surady.

12 shildede Úndistannyń avıatsııalyq oqıǵalardy tergeý bıýrosy (AAIB) atalǵan apatqa qatysty aldyn ala esep jarııalady. Onda ushaqtyń eki qozǵaltqyshyna da otyn berý óshirilgeni kórsetilgen. Kabınadaǵy jazbalarda bir ushqyshtyń ekinshisine: «Siz nege qozǵaltqyshtardy óshirdińiz?» — dep suraǵany, al ol: «Men ondaı áreket jasaǵan joqpyn», — dep jaýap bergeni tirkelgen.

Apat kezinde áýe kemesin 60 jastaǵy ushqysh Sýmıt Sabgarval (8 200 saǵat ushý tájirıbesi) men 26 jastaǵy Klaıv Kýnder (1 100 saǵat ushý tájirıbesi) basqarǵan.

Aıta ketelik 12 shildede bortynda 240 adam bolǵan Air India ushaǵy apatqa ushyrap, dárigerlerge arnalǵan jataqhana ǵımaratyna qulaǵan. SІM apatqa ushyraǵan bortta zardap shekken qazaqstandyqtar joq dep málimdedi. Sonymen qatar bir jolaýshy tiri qalǵany týraly da jazǵan edik.

Buǵan deıin habarlanǵandaı, Úndistanda ushaq apaty boıynsha aldyn ala esep jarııalandy.