Bodrýmda 51 Qazaqstan azamaty demalýda - Túrkııadaǵy QR Elshiligi
«21 shildede bastalǵan Túrkııada Egeı teńiziniń jaǵalaýyndaǵy aımaqtarda jer silkinisi qaıtalanyp otyr. Bodrým provıntsııasy ákimdigi men Tótenshe jaǵdaılar basqarmasynyń málimetterine sáıkes, 21 shildede jergilikti ýaqyt boıynsha shamamen saǵat 20:09-da terbelisi 5 baldyq jer silkinisi bir ret bolǵan, sondaı-aq mezgil-mezgil saıyn qaıtalanyp otyrǵan dúmpýler 4 baldan aspaýda. Ystanbul tehnıkalyq ýnıversıtetiniń Geofızıka bóliminiń mamandarynyń habarlaýynsha endigi kezekte alǵashqy jer silkinisinen keıin taǵy bir joǵary silkinis bolý yqtımaly óte az. Óz kezeginde, 5 baldan tómen qosalqy silkinister 3 aptaǵa sozylýy múmkin.
Túrkııanyń Kandıllı jer silkinisi observatorııasynyń dırektory Halýk Ózenerdiń aıtýynsha, Túrkııa aýmaǵynyń 80-85 paıyzynda jer silkinisi bolý qaýpi bar. Ár 25-30 jylda jańa bir jer silkinisi, ár 1,5-2 jylda kúshtiligi 6 baldan asatyn jer silkinisi bolyp otyrýy múmkin. Qazirgi tańda túrik úkimeti atalǵan jaǵdaıǵa baılanysty daǵdarys ortalyǵyn qurǵan. Osy rette, Bodrým aımaǵyndaǵy ǵımarattardyń alǵashqy jer dúmpýinde kishigirim zardaptardyń oryn alýy, osy aımaqtaǵy ǵımarattardyń alasa bolýy jáne sapaly bolýynyń arqasynda bolyp otyr. Jergilikti resmı málimetterge sáıkes, zilzalalar saldarynan qaza tapqandar tirkelmedi, jaraqat alǵandardyń ishinde QR azamattary joq», - delingen habarlamada.
Elshiliktiń habarlaýynsha, Bodrýmdaǵy týrıstik nysandar jáne jergilikti áýejaı, halyqaralyq baǵyttaǵy áýekompanııalarynyń ushýlary turaqty túrde jalǵasyp jatyr.
«QR Ystanbuldaǵy Bas konsýldyǵy jergilikti bılikpen, qazaqstandyq týrıstik operatorlarmen (ásirese, Bodrým baǵytynda jumys isteıtin qazaqstandyq «Kompas» týrıstik kompanııasymen) jáne Almaty - Ystanbul (Sabıha Gókchen halyqaralyq áýejaıy) - Bodrým baǵyty boıynsha turaqty ushatyn Pegasýs áýejoldary kompanııasynyń ókilderimen tyǵyz baılanys ornatyldy. Pegasýs áýe joldarynyń málimetterine sáıkes, áýe kompanııanyń turaqty Almaty-Ystanbul-Bodrým baǵyttary boıynsha ushýlary kestege sáıkes jalǵastyrylýda», - delingen habarlamada.
Qazir Elshilik Qazaqstan azamattarymen baılanys ornatýdy qolǵa alǵan. «Telefon soqqan QR azamattarymen jáne Bodrýmda ornalasqan qonaq úılermen jeke-jeke baılanys quryp azamattarymyz jaıynda aqparat jınaqtaý jumystary jalǵasýda.
Qazirgi tańda atalǵan aımaqtardaǵy 20-ǵa jýyq azamattarmen baılanys ornatyldy. Qolda bar aqparatqa sáıkes týrıstik agenttikter arqyly Bodrým provıntsııasynda 51 QR azamaty demalýda. QR azamattarynyń qalaýy boıynsha Túrkııanyń basqa aımaqtarynda demalystaryn jalǵastyrý úshin týrıstik agenttiktermen habarlasyp, tikeleı baılanys ornatyldy», - dep málim etti dıplomattar.
Bodrým baǵytynda jumys isteıtin qazaqstandyq «Kompas» túrıstik agenttiginiń aqparatyna sáıkes, Pegasýs áýekompanııasymen aldaǵy aptada shamamen 60 Qazaqstan azamatynyń Bodrým qalasyna ushýy kútilýde. Túrik áýe joldary 22 shildede jergilikti ýaqyt boıynsha saǵat 19.00-da 157 adamdyq TK 4910 reısimen qosymsha tasymaldaý jasaıtyny jáne kúndelikti reısterge jolaýshy sanyn arttyratyny týraly habarlaıdy.
Túrkııadaǵy Qazaqstan Elshiligi qaýyrt jeli qurǵanyn málimdedi. «Jalpy alǵanda, Ystanbuldaǵy Elshilik jáne Antalııadaǵy konsýldyq ahýaldy baqylaýda ustaýda. Otandastarymyzdyń aqparat jáne kómek alý boıynsha tikeleı jáne jedel baılanys qurylǵan. Olar:
- Qazaqstan Respýblıkasynyń Túrkııadaǵy Elshiligi (Ankara qalasy): +90 312 491 91 00- ishki nómiri: 9
- QR Ystanbuldaǵy Bas konsýldyǵy: +90 212 662 53 47/48- ishki nómiri: 111
- QR Antalııadaǵy konsýldyǵy: +90 242 324 26 11», - delingen jazbada.