Bodı massajdy jeleý etip 2 mıllıard teńge tabys tapqan Astana turǵyny ustaldy
ASTANA. KAZINFORM – QMA Astanalyq departamenti bodı massajdyń atyn jamylyp, jezókshelikpen aınalysý úshin prıton uıymdastyryp, onymen qoımaı qylmystyq kiristerdi zańdastyrǵan Astana turǵynyn ustady.
— 2021-2023 jyldar aralyǵynda Astana turǵyny jezókshelikpen aınalysý úshin prıton uıymdastyryp, 2 mıllıard teńge qylmystyq tabys alǵan. Follow the money (aqshany qadaǵalańyz) paralleldi qarjylyq tergeý kúdiktiniń shottaryna týystary men senimdi tulǵalarynyń banktik derektemelerin paıdalana otyryp, zańdastyrýdyń kúrdeli shemalary arqyly túsken barlyq qylmystyq tabysty anyqtaýǵa múmkindik berdi, — delingen habarlamada.
Qylmystyq tabysty zańdastyrý maqsatynda kúdikti óz atyna JShS tirkep, aýyl sharýashylyǵy daqyldaryn satyp alyp, qaıta satqan. Osylaısha, ol 88,5 mıllıon teńgeni zańdastyryp, 95 mıllıon teńge qylmystyq tabysqa qol jetkizgen.
Qylmystyq jolmen alynǵan qarajatqa kúdikti:
— 350 mln teńgege salynyp jatqan obektidegi aýdany 500 sh. m. kommertsııalyq úı-jaı;
— 92 mln teńgege óz balasyna kútim jasap júrgen jónindegi jaldamaly qyzmetkerge tirkelgen jalpy aýdany 329,1 sh. m. 5 eki bólmeli páter;
— 667,5 mln teńgege Astana qalasynda jalpy aýdany 784 sh. m. jer ýchaskeleri bar eki kottedj;
— 335,4 mln teńgege elordanyń elıtalyq turǵyn úı keshenderinde jalpy aýdany 292 sh. m. 2 páter men turaq oryn;
— 114 mln teńgege G63 markaly Mercedes Benz avtokóligin satyp alǵan.
Sonymen qatar, tintý kezinde 50 mln teńge men baǵaly zergerlik buıymdar tabylyp, olarǵa tyıym salyndy.
Tergeýdiń bastalǵanyn bilgen kúdikti tárkileýden jaltarý úshin 5 eki bólmeli páterdi 143,5 mıllıon teńgege satyp úlgergen. Páter satý arqyly ústinen 51,5 mıllıon teńge qosymsha tabysqa kenelgeni belgili boldy.
Sot úkimimen ol jezókshelikpen aınalysý úshin prıton uıymdastyrǵany jáne qylmystyq jolmen alynǵan qarajatty zańdastyrǵany úshin (QR QK 309-bap, 218-bap 3-tarmaǵy) 6 jylǵa bas bostandyǵynan aıyrylyp, múliki men páterlerdi satý arqyly alynǵan aqshasy tárkilendi, - dep habarlady QMA.
Tergeý nátıjesinde qylmystyq jolmen tapqan 2 mıllıard teńgeden asatyn qarajatqa satyp alynǵan barlyq múlik pen sol múlikten túsken kiristeri anyqtalyp, tárkilendi.
Sonymen qatar, páterlerdiń ıeleri týraly jalǵan kýálik bergen bala kútimi boıynsha jaldanǵan qyzmetkerge qatysty tergeý bastaldy.
Eske sala keteıik, buǵan deıin eriktiler qozǵalysynyń belsendisi jáne qoǵamdyq qaıyrymdylyq qorynyń quryltaıshysy Perızat Qaırat ustalyp, alaıaqtyq jolmen tapqan dúnıe-múlki tárkilengenin jazǵan bolatynbyz.