Bochellımen bir sahnada óner kórsetken qazaq qyzy jospary týraly aıtty

ASTANA. KAZINFORM — Jaqynda Italııanyń Napolı qalasynda ótken kontsertte otandasymyz, opera ánshisi Áıgerim Altynbek áıgili Andrea Bochellımen birge sahnaǵa shyǵyp, kórermenderdi tánti etti. Ánshi alǵan áserimen Jibek Joly telearnasynyń «Búgin LIVE» baǵdarlamasynda bólisti.

Áıgerimniń aıtýynsha, Italııadaǵy kontsert aldyn ala, bir aı buryn josparlanǵan.

— Kontsert aldynda maestro, ańyz adam Andrea Bochellıdiń qoldaýy erekshe boldy. Kez kelgen kontserttiń aldynda qobaljý bolady, biraq ony jaǵymdy qobaljý dep atar edim, — deıdi Áıgerim.

Ánshi týǵan elde, Almatyda ótken kontsertke de toqtaldy.

— Bul — eń úlken baqyt, erekshe jetistik boldy. Qazaq eliniń keremet qoshemetin sezindik. Óz elińniń aldynda óner kórsetý — úlken jaýapkershilik, — deıdi ol.

Áıgerim buǵan deıin «La Skala» teatry akademııasynda shyńdalý armany bolǵanyn aıtty.

— «La Skala» teatrynda eki jyldaı tálim alyp jatyrmyn. Qazir jańa operaǵa daıyndyq ústindemiz, spektaklde óner kórsetemin. Sondaı-aq konkýrstar, kontsertter jáne túrli rólderge tyńdalymdar josparlanyp otyr, — dep bólisti ánshi.

Aıta keteıik, buǵan deıin Áıgerim Altynbek XI Halyqaralyq CLIP 2025 opera baıqaýynda jeńiske jetken bolatyn.