Bochchadan Qazaqstan chempıonaty maýsym aıynda ótedi
ASTANA. QazAqparat – Paralımpıadalyq sport túri – bochchadan eń aýqymdy jarys 1-4 maýsymy aralyǵynda ótedi, dep habarlaıdy QazAqparat Qazaqstan bochcha federatsııasynyń baspasóz qyzmetine silteme jasap.
Chempıonat elordadaǵy Jaqsylyq Úshkempirov atyndaǵy sport saraıynda uıymdastyrylady. Jarysqa tirek-qımyl apparatynda aqaýy bar sportshylar qatysady. Elimizdiń ár óńirinen 15 jas jáne odan joǵary 50-ge jýyq sportshy baq synaıdy dep josparlanyp otyr.
«Chempıonattyń ótkizilýi – elimizde sporttyń osy túrin damytýdaǵy mańyzdy jetistik. Bochchamen búkil álemde múgedektigi bar adamdar aınalysady. Qazaqstan úshin bul salystyrmaly túrde jańa sport túri, soǵan qaramastan ony bizdiń erekshe sportshylarymyz jaqsy kóredi. Óıtkeni, bul kúrdeli dıagnozy bar azamattarǵa óz áleýetin júzege asyrýǵa múmkindik beredi. Chempıonat elimizdiń túkpir-túkpirinen kelgen úzdik sportshylardyń basyn qosyp, umytylmas emotsııalar syılaıdy. Qyzyǵýshylyqtary uqsas adamdar bir-birimen til tabysyp, básekelestik sezimin bastarynan ótkeredi. Barshańyzdy osynaý sport pen ınklıýzııa merekesinde kútemiz», - deıdi federatsııa prezıdenti, Qazaqstan Respýblıkasy Parlamenti Senatynyń Tóraǵasy Máýlen Áshimbaev.
Chempıonattyń óńirlerdegi irikteý kezeńderi aıaqtalyp, elordadaǵy respýblıkalyq jarystarǵa keletin barlyq oıynshylar anyqtaldy.
Chempıonat úsh razrıad boıynsha ótedi:
1) jalǵyz: bir-birden, ár oıynshyǵa alty doptan;
2) qosarlanady: eki-ekiden, ár oıynshyǵa úsh doptan;
3) komanda: úsh-úshten, ár oıynshyǵa eki doptan beriledi.
Oıyn jeke jáne juptyq jarysta 4 synnan jáne komandalyq jarysta 6 synnan turady.
Jarys nátıjesinde Qazaqstan quramasy jańartylyp, sodan keıin olar bıylǵy úsh halyqaralyq jarysqa qatysady: eki halyqaralyq saıysqa jáne Azııa Paralımpıada oıyndaryna.
Eske salsaq, Qazaqstan bochcha federatsııasy resmı túrde Boccia International Sports Federation (BISFed) – Halyqaralyq bochcha federatsııasynyń múshesi bolǵan edi.
