Bochcha erekshe sportshylary Azııa oıyndaryna attandy
Bochchadan Qazaqstan quramasy Qytaıdyń Hanchjoý qalasynda ótetin Azııa para oıyndaryna tarıhta alǵash ret qatysyp jatyr. Aıta keteıik, jarys dástúrli túrde normatıvtik sportshylar qatysatyn Azııa oıyndarymen bir jerde ótedi, dep habarlaıdy Kazinform.
Parasportshylardy elorda áýejaıynan shyǵaryp salýǵa týǵan-týystary men dostary, BAQ ókilderi, sondaı-aq osy sport túriniń jankúıerleri keldi.
Olar Qazaqstannyń namysyn qorǵap, ózge eldiń tájirıbeli oıynshylarymen básekege túsetin komanda múshelerin jyly lebizben shyǵaryp saldy.
Esterińizge sala keteıik, bochcha — doppen oınaıtyn, tirek-qımyl apparaty buzylǵan balalar men eresekterge sportta ózin-ózi tanytýǵa múmkindik beretin paralımpıadalyq sport túrleriniń biri.
Bul sport túrinen oıynshylardy 2021 jyly múmkindigi shekteýli balalardy tárbıelep otyrǵan ata-analar men «Teń múmkindikter álemi» qory jattyqtyrýshylarynyń bastamasymen qurylǵan Qazaqstannyń bochcha federatsııasy daıyndaıdy.
Federatsııanyń Qazaqstan aýmaǵynda 10 fılıaly bar.
Federatsııanyń múmkindikterin keńeıtýde onyń prezıdenti, Senat tóraǵasy Máýlen Áshimbaev mańyzdy ról atqarady.
Bıyl Qazaqstan bochcha federatsııasy resmı túrde Halyqaralyq bochcha federatsııasyna (BISFed) múshe boldy.
Bul — úlken jetistik, óıtkeni federatsııaǵa múshe bolý sportshylarǵa jańa múmkindikter ashady.
Osynyń arqasynda otandyq federatsııa ókilderi bochchadan halyqaralyq jarystarǵa: chellendjerlerge, álem chempıonattaryna, Paralımpıadaǵa jáne Azııa para oıyndaryna qatysa alady.
Maýsym aıynda elimizde aýqymdy jarys — Qazaqstan Respýblıkasynyń chempıonaty ótti.
Onyń qorytyndysy boıynsha Qytaıǵa baratyn komandanyń quramy anyqtaldy.
