Bobı shynymen 31 jyl ómir súrdi me — Gınnes rekordtar kitaby tergeý júrgizip jatyr
Gınnestiń rekordtar kitaby álemdegi eń kári ıt ataǵyna ótinim qabyldaýdy ýaqytsha toqtatty. Óıtkeni burynǵy rekordshy, portýgaldyq mastıf Bobıdiń ataǵy kúmán týǵyzǵan, dep jazady VVS.
Ótken jyly Bobı (tuqymynyń resmı ataýy — Rafeırý dý Alentýjý) jaıly álemdik BAQ eki ret shýlady: birinshisinde Rekordtar kitaby oǵan álemdegi eń kári ıt mártebesin bergende jáne ólgen soń planetamyzda buryn-sońdy eń uzaq tirshilik etken ıt atanǵanda.
Bobı ótken jyldyń qazan aıynda 31 jyl 165 kún ómir súrip, kóz jumdy. Bul jasty adam jasynyń balamasymen sanasaq, ol 217 jyl ómir súrgen eken. Buǵan tipti veterınarlar da sene almaı otyr.
«Meniń veterınar áriptesterimniń eshqaısysy Bobıdiń shynymen 31 jasta bolǵanyna senbeıdi», — dedi Koroldik mal dárigerleri kolledjiniń keńes múshesi, veterınar Dennı Chembers brıtandyq Guardian gazetine.
Onyń aıtýynsha, Gınnestiń rekordtar kitaby veterınarlar aldynda bedelin saqtap qalǵysy kelse, bultartpas dálelder usynýy kerek.
Bobı uzaq ómir súrdi, biraq rekord jasaǵan joq dep esepteıtinder nege solaı oılaıdy?
Portýgal mastıfteriniń ortasha ómir súrý uzaqtyǵy — 12-14 jyl. Veterınarlardyń aıtýynsha, Bobıdiń ortasha kórsetkishten eki ese artyq tirshilik etkenin elestetýdiń ózi óte qıyn.
Ittiń uzaq jasaýyna kúmán keltirgen taǵy bir jaıt resmı tirkeýge qatysty: onyń shynymen 1992 jyly týǵanyn kim, qalaı jáne qashan tekserdi?
Portýgalııada búkil úı janýarlary tirkelgen Sistema de Informação de Animais de Companhia (SIAC) ulttyq derekter bazasy bar.
Wired jetekshi jýrnalısteriniń biri Mett Reınolds rekordshynyń jasyn rastaý nemese joqqa shyǵarýdy ótinip SIAC-pen tikeleı baılanysqa shyqqan.
Ol alǵan jaýap jaǵdaıdy túsindirýdiń ornyna kerisinshe, bárin shatastyrdy.
«Biz Bobı esimdi ıttiń SIAC-ta 2022 jyldyń 3 shildesinde tirkelgenin rastaı alamyz, — dep jazady hatynda SIAC úılestirýshisi Eýrıko Kabrala. — Janýardyń ıesi onyń 1992 jyly týǵanyn aıtty, biraq bizde muny rastaıtyn nemese joqqa shyǵaratyn derekter joq».
Kúmánniń bári ıttiń súıegi krematsııalanǵannan keıin týǵandyqtan ıttiń qurmetti jasynyń nemese onyń burynǵy ıesiniń aldaǵanynyń bultartpas dáleli joq jáne bolýy da múmkin emes.
Endi janama dáleldemege júginý kerek.
