Bóbekter úıinde balalar 6 jasqa deıin bolýy kerek – depýtat
NUR-SULTAN. QazAqparat – Májilis depýtaty Zaǵıpa Balıeva ata-anasynyń qaraýynsyz qalǵan balalardyń problemasyn qozǵady. Ol Úkimet basshysy Asqar Mamınniń atyna depýtattyq saýal joldady, dep habarlaıdy QazAqparat tilshisi.
«1994 jyly Qazaqstan balalar quqyǵy týraly BUU Konventsııasyn ratıfıkatsııalady. Onyń 3-shi babyna sáıkes, Konventsııaǵa múshe memleketterdiń bári de óziniń balalarǵa degen qarym-qatynasynda eń birinshi kezekte olardyń múddelerin qamtamasyz etý máselesine nazar aýdarady. Ásirese ata-analarynyń qaraýynsyz qalǵan jáne múgedek balalardy memleket erekshe qamqorlyqqa alýy tıis», - deıdi Zaǵıpa Balıeva Parlament Májilisiniń otyrysynda.
Onyń aıtýynsha búgingi tańda elde 20 Bóbekter úıi bar. Onda úsh jasqa deıingi saý jáne tórt jasqa deıingi múmkindigi shekteýli balalar turady. Jylyna 200-ge tarta bala ol mekemelerden balalar úıine nemese mamandandyrylǵan ınternattarǵa ornalastyrylady.
«Áıtse de olardyń Bóbekter úıinen balalar úıine nemese mamandandyrylǵan ınternattarǵa 3-4 jasynda jetkizilýi bóbekterge aýyr psıhologııalyq soqqy bolyp tıedi. Buǵan jol bermeý kerek. Ǵalymdardyń zertteýinshe 0-6 jas aralyǵyndaǵy balalarǵa erekshe qamqorlyq kórsetilýi tıis, sebebi dál osy aralyqta bala tulǵa bolyp qalyptasady. Bóbekter úıindegi tárbıeshi pedagogıkalyq qyzmetker rólin ǵana atqarmaıdy, ol kóbinese balaǵa ana ornyna ana bolady. Ony baǵyp-qaǵyp, bóbekterge qıyndyqtardan qınalmaı ótýge kómektesedi. Sol sebepti osynaý jyly qarym-qatynasty barynsha uzartyp, bóbekke mektepke deıingi búkil balalyq shaǵyn ony túsinetin jaqyndarynyń ortasynda ótkizýge múmkindik berý kerek», - deıdi depýtat.
Zaǵıpa Balıeva osy máselege baılanysty Úkimet basshysynan balalardyń Bóbekter úıindegi tárbıelený merzimin 6 jasqa deıin uzartýdy surap otyr. Aıtýynsha bul sharalar respýblıkalyq bıýdjetten qosymsha shyǵyndardy qajet etpeıdi.
