«Bóbek» ulttyq ǵylymı-tájirıbelik, bilim berý jáne saýyqtyrý ortalyǵynda S. Alpysqyzynyń bilim granttary tabystaldy
ASTANA. 4 qyrkúıek. QazAqparat - 2012 jyly 30 shildede jarııalanǵan «QR joǵary oqý oryndarynda, tehnıkalyq jáne kásiptik bilim berý uıymdarynda bilim alý úshin Sara Alpysqyzynyń bilim grantyn berý týraly erejege» sáıkes júrgizilgen ІІ týrdyń nátıjesi boıynsha baıqaý jeńimpazdary anyqtalyp, 70 túlek bilim granttarynyń ıegeri atandy.
QR Bilim jáne ǵylym mınıstrliginiń málimetinshe, atalmysh is-shara osymen ekinshi ret uıymdastyrylyp otyr. Alǵash ret 2011 jyly uıymdastyrylyp, respýblıka boıynsha 72 talapker bilim alý múmkindigine ıe bolǵan edi.
Sara Alpysqyzynyń bilim granttary jetim balalarǵa, áleýmettik az qamtylǵan, kópbalaly otbasydan shyqqan balalarǵa, asyraýshysynan aıyrylyp, ata-anasynyń biriniń qamqorynda qalǵan balalarǵa áleýmettik kómek kórsetý maqsatynda taǵaıyndalady.
Baıqaýdyń ekinshi kezeńinen respýblıka boıynsha barlyǵy 70 talapker ótip, 50 túlek joǵary oqý oryndarynda, 20 túlek tehnıkalyq jáne kásiptik bilim berý uıymdarynda bilim alýǵa múmkindik aldy.
Bilim granttaryn saltanatty túrde tabystaý rásiminde Elimizdiń birinshi hanymy «Bóbek» qaıyrymdylyq qorynyń Prezıdenti Sara Alpysqyzy grant ıegerlerin quttyqtady.
Tabystaý rásimi kontserttik baǵdarlamamen jalǵasty.
