«Bóbek» ortalyǵynyń «Poezııa» stýdııasy óz jumysyn bastady

Oǵan Respýblıkanyń túkpir-túkpirinen 9-15 jas aralyǵyndaǵy 42 bala qatysýda.

Stýdııanyń ashylý saltanatyna halyq aqyny, QR Jazýshylar odaǵynyń múshesi, Esenın atyndaǵy «Altyn juldyz» ıegeri, «Juldyz» jýrnalynyń bas redaktory Ulyqbek Esdáýlet, Adamnyń úılesimdi damýy ınstıtýtynyń dırektory Botagóz Qudysheva jáne ortalyq qyzmetkerleri qatysty.

«Qazaq halqy sóz qudiretine erekshe mán bergen. Abylaı, Táýke syndy handarymyz aınalasynda sóz qudiretin baǵalaı bilgen jyraý, aqyndardy jınap júrgen, solarmen aqyldasqan. Elge jańalyqty da aqyndar arqyly jarııa etken. Úsh júzdiń bıi halyqtyń basyn biriktirip, daý-damaıdy bir aýyz sózben sheshken», - dedi óz sózinde «Ózin-ózi taný» kolledjiniń dırektory Beıbit Jaqubaqynov.

Ulyqbek Esdáýlet ár adamnyń boıynda Táńirden berilgen erekshe daryn, qabilet bolatyndyǵyn aıta kele, ol oqý, izdenis, talap arqyly pisip jetiletindigin jetkizdi. «Poezııaǵa jaqyn adam eń aldymen shyndyqty súıýi kerek, sebebi aqyn - aqıqattyń jarshysy, ári qorǵaýshysy. Sondyqtan «Bóbek» ortalyǵynyń bul ıgi bastamasyna tabys, shyǵarmashylyǵyn shyńdaýǵa kelgen barsha qatysýshylarǵa sáttilik tileımin», - dep jyly lebizin bildirdi ol.

«Poezııa» stýdııasy áleýmettik ahýaly nashar otbasynan shyqqan daryndy balalarǵa tulǵa bolyp qalyptasýyna qoldaý kórsetý jáne balalar shyǵarmashylyǵyna qoǵam nazaryn aýdarý maqsatynda uıymdastyrylyp otyr. Baǵdarlama aıasynda qazaq eliniń tarıhı-mádenı qundylyqtary men ádet-ǵuryptaryna súıene otyryp jasóspirimder arasynda rýhanı-adamgershilik tálim-tárbıe jumystaryn júrgizý, áleýmettik ahýaly nashar otbasynan shyqqan daryndy balalarǵa fotosýret ónerinen sapaly bilim berý, jeke jáne ujymdyq jumystar arqyly balanyń shyǵarmashylyǵyn damytý, sondaı-aq olarǵa qoldaý kórsetý maqsatynda memlekettik jáne qoǵamdyq uıymdarmen birlesip jumys isteý máseleleri qarastyrylǵan.