«Bóbek» ortalyǵynda «Sýret óneri» stýdııasy ashyldy
ALMATY. 30 mamyr. QazAqparat /Názıra Eleýhan/ - Búgin Almatydaǵy «Bóbek» Ulttyq ǵylymı-tájirıbelik, bilim berý jáne saýyqtyrý ortalyǵynda (UǴTBSO) áleýmettik ahýaly nashar otbasynan shyqqan talantty balalar men jetkinshekterge arnalǵan «Sýret óneri» stýdııasy ashyldy.
Atalmysh sharanyń saltanatty ashylý rásimine «Bóbek» ortalyǵynyń basshylary, Sýretshiler odaǵynyń músheleri, sonymen qatar, 9-15 jas aralyǵyndaǵy 50-ge jýyq bala qatysty.
"Stýdııany ashýdaǵy basty maqsat - turmystyq jaǵdaıy nashar otbasynan shyqqan daryndy balalarǵa áleýmettik qoldaý kórsetý, izgi qundylyqtardy boılaryna sińirý arqyly óz derbestigin sanaly túsinýge jaǵdaı jasaý, beıneleý ónerine beıimdi jastardy tartý arqasynda shyǵarmashylyǵyn jetildirý, balalar shyǵarmashylyǵyna barsha qaýymdastyqtyń nazaryn aýdarý bolyp tabylady. Beıneleý óneriniń jumysymen tanysqan ár bala boıyndaǵy darynyn jetildirýge, bilimin tereńdetýge jáne osy salada mol tájirıbe jınaqtaǵan has sheberlermen betpe-bet kezdesip tálim-tárbıe alýǵa jol ashady",-dedi «Bóbek» UǴTBSO janyndaǵy Adamnyń úılesimdi damýy ınstıtýtynyń dırektory Aqberen Elgezek. Onyń aıtýynsha, stýdııanyń ashylýy balalar men jetkinshekterge sapaly bilim alýǵa jańa múmkindikter bermek.
"Sýret óneri" stýdııasynda balalarǵa sheberlik dárister, baıqaýlar, ekskýrsııalar men oıyn-saýyq baǵdarlamalary udaıy uıymdastyrylyp turatyn bolady",-dedi A. Elgezek stýdııanyń ashylý saltanatynda. Onyń aıtýynsha, jyl boıy stýdııa jumysynyń qorytyndysy boıynsha úzdik dep tanylǵan jumystar negizinde kórme uıymdastyrylyp turmaq. "Eń úzdik jumystar «Samopoznanıe. KZ» jýrnalynda jarııalanady, sonymen qatar www.bobek.kz saıtynda ornalastyratyn bolady.
