«Bóbek» qory kóp balaly januıaǵa kólik tabys etti
ALMATY. 19 sáýir. QazAqparat /Ádilet Musahaev/ - Búgin Almaty oblysy Esik qalasynda kóp balaly otbasyǵa «Bóbek» qory atynan «Folksvagen» markaly avtokólik tabys etildi.
«Bóbek» qorynyń resmı ókili, Adamnyń úılesimdi damýy ınstıtýtynyń dırektory Aqberen Elgezektiń aıtýynsha, Esenovter otbasynda 15 bala bar eken. «Alǵashqy balany Nuryl men Roza 1996 jyldary asyrap alǵan. Olardyń barlyq balasy ár túrli taǵdyrdy basynan keshirgen. Keıbirin balalar úıinen asyrap alsa, taǵy bireýin tastandy jerinen taýyp alǵan. Olardyń óz balasy joq, sondyqtan olar balaǵa degen óz mahabbattary men jylylyqtaryn ata-ananyń qamqorynsyz qalǵan osy sábılerge berýde», - deıdi A.Elgezek.
Esenovter otbasynyń taýly aımaqta ornalasqan óz sharýashylyǵy bar, sondyqtan «Bóbek» qory aýyr jolǵa shydamdy mashınany syılaýdy jón kórgen. Sondaı-aq Esenovter januıasy da ózderine kóńil aýdaryp, qol ushyn sozyp jatqan qorǵa rızashylyqtaryn bildirdi. Otaǵasy óz kezeginde mundaı kólik jumys barysynda úlken kómegin tıetindigin jetkizdi.
