«Bóbek» daryndy jastardy qoldaý maqsatynda shyǵarmashylyq stýdııa ashyp otyr
ALMATY. 8 shilde. QazAqparat /Ádilet Musahaev/ - Aǵymdaǵy jyldyń 11-15 shilde aralyǵynda «Bóbek» UǴTBSO-nyń «Keskindeme» shyǵarmashylyq stýdııasy jumys istemek.
9-15 jas aralyǵyndaǵy balalar qatysatyn bul stýdııa áleýmettik ahýaly nashar otbasynan shyqqan daryndy balalarǵa tulǵa bolyp qalyptasýyna qoldaý kórsetý jáne balalar shyǵarmashylyǵyna qoǵam nazaryn aýdarý maqsatynda uıymdastyrylyp otyr.
Baǵdarlama aıasynda Qazaqstannyń tarıhı-mádenı qundylyqtary men ádet-ǵuryptaryna súıene otyryp, jasóspirimder arasynda rýhanı-adamgershilik tálim-tárbıe jumystaryn júrgizý kózdelgen. Sondaı-aq áleýmettik jaǵdaıy tómen otbasynan shyqqan daryndy balalarǵa keskindeme ónerinen sapaly bilim berý, jeke jáne ujymdyq jumystar arqyly balanyń shyǵarmashylyǵyn damytyp, olarǵa qoldaý kórsetý maqsatynda memlekettik jáne qoǵamdyq uıymdarmen birlesip jumys isteý máseleleri qarastyrylǵan.
Shara aıasynda jas talanttar belgili sýretshilerdiń jetekshiligimen keskindeme óneriniń qyr-syrymen tanysady, murajaıdaǵy kórmelerge barady. Sheberlik dáristerin D. Álıev, A. Hákimjanova, S. Jumasheva, S. Nákisbekova syndy belgili sýretshiler ótkizbek.
Stýdııa jumysynyń qorytyndy bóliminde daryndy sýretshilerdiń úzdik jumystary kórmege qoıylady. Sonymen qatar ár qatysýshyǵa «Bóbektiń» sertıfıkaty beriletin bolady.
