BMW órt shyǵý qaýpine baılanysty júzdegen myń avtokólikti keri qaıtaryp jatyr

ASTANA. KAZINFORM – Germanııanyń BMW avtokontserni qozǵaltqyshty iske qosý kezinde qysqa tuıyqtalý qaýpine baılanysty álem boıynsha júzdegen myń avtokólikti keri qaıtarý naýqanyn bastady, dep jazady DW.

Bavarııalyq óndirýshiniń málimetinshe, Germanııanyń ózinde 28 582 avtokólik keri qaıtarylýǵa jatady. Buǵan deıin kfz-Betrieb salalyq basylymy álem boıynsha 575 000 avtokólik keri qaıtarylatynyn habarlaǵanymen, BMW kompanııasy ázirge bul sandy resmı túrde rastaǵan joq.

Kompanııa tekserý barysynda qozǵaltqyshty iske qosý kezinde qysqa tuıyqtalý bolýy múmkin ekenin anyqtaǵan.

– Eń nashar jaǵdaıda bul qozǵaltqysh jumys istep turǵan kezde avtokóliktiń órtenýine ákelýi múmkin. Mundaı jaǵdaıda qozǵalys kezinde nemese kólikten shyqqanda tútin baıqalýy ne kúıik ıisi sezilýi yqtımal, – dep málimdedi kompanııa ókilderi.

Sondaı-aq júrgizýshilerge qozǵaltqyshy qosýly turǵan kólikti qaraýsyz qaldyrmaý usynyldy.

Aqaý 2020 jylǵy shilde men 2022 jylǵy shilde aralyǵynda shyǵarylǵan, starter relesi ornatylǵan BMW avtokólikterine qatysty. Atap aıtqanda, BMW 2 Series Coupe, 3, 4 jáne 5 serııalarynyń birqatar nusqalary, 6 Series Gran Turismo, sondaı-aq BMW X4, X5, X6 jáne Z4 modelderi qamtylǵan.

Eske sala keteıik, buǵan deıin Nissan da 26 myńnan astam kóligin keri qaıtaryp jatqany habarlanǵan edi.