BMW órt qaýpine baılanysty 330 000 kólikti keri qaıtaryp aldy
ASTANA. KAZINFORM — Kabelderdiń durys salynbaýyna baılanysty BMW kontserni búkil álem boıynsha 330 myńǵa jýyq kólikti qaıtaryp alý týraly sheshim qabyldady. Aqaý kóliktiń órtenýine ákelýi múmkin, dep habarlaıdy DW.
BMW kompanııasy aspaptar klasterindegi qysqa tuıyqtalý qaýpine baılanysty álem boıynsha shamamen 330 000 kólikti keri qaıtaryp alady. Bul týraly federaldyq avtomobıl kóligi basqarmasynyń (Kraftfahrt-Bundesamt, KBA) derekqorynda jarııalanǵan.
Bul 2022 jyldyń 9 maýsymy men 2025 jyldyń 5 jeltoqsany aralyǵynda shyǵarylǵan i5, 7, M5, 5 jáne i7 serııaly markasyna qatysty. BMW kompanııasy «kabınanyń mıkrofıltrin aýystyrǵan kezde aspaptar klasterindegi qate sym kabelderdiń zaqymdalýyna jáne yqtımal qysqa tuıyqtalýǵa, onyń sońy órtke ákelýi múmkin ekenin túsindirdi.
Kompanııa ázirge bul aqaý boıynsha jazataıym oqıǵa tirkelmegenin jetkizdi. Olar BMW maıy men kabına súzgisin aýystyrǵan tutynýshylarǵa kólik symdarynyń qaýipsizdigin dereý tekserip, retteýge keńes beredi.
Eki apta buryn BMW kóliginiń júzdegen myńy basqa aqaýǵa baılanysty keri qaıtarylǵan bolatyn.
2026 jyldyń aqpan aıynyń basynda BMW kontserni qozǵaltqyshtyń órtený qaýpine baılanysty shamamen 500 000 kólikti keri qaıtaryp alý týraly habar taratty.
2 serııaly kýpe, 3, 4 jáne 5 serııalarynyń birneshe nusqalary, 6 serııaly Gran Turismo, 7 serııaly lımýzın jáne BMW X4, X5, X6 jáne Z4 synaqtary olardyń magnıttik iske qosý qosqyshy qozǵaltqyshty qaıtalap iske qosqannan keıin tozýy múmkin ekenin kórsetti. Bul kólikti iske qosýda qıyndyqtarǵa, qysqa tuıyqtalýǵa jáne starterdiń qyzyp ketýine ákelýi múmkin.