BMW basshysy Frankfýrtta kólik salonynyń ashylý jıynynda esinen tanyp qulady
ASTANA. QazAqparat - BMW Frankfýrt qalasyndaǵy Halyqaralyq kólik salonynyń ashylýy kezinde jańa úlgileriniń tanystyrylymy kenetten toqtatyldy. Oǵan kompanııa basshysy Harald Krıýgerdiń sahnada esinen tanyp qulaýy sebep boldy. Bul jaǵdaı tusaýkeserdiń bastalýynan keıin kóp uzamaı oryn alǵan.
49 jastaǵy bas dırektordy sahnadan alyp ketti, tanystyrylym belgilenbegen ýaqytqa keıingi qaldyryldy.
Kompanııa ókili Maksımıllıan Sheberldyń aıtýynsha, Krıýgerdiń basy aınalǵan. Qazirgi ýaqytta onyń jaǵdaıy qalypty, ózin jaqsy sezinýde. Sheberl sondaı-aq Krıýgerdiń ózin tusaýkeser bastalmas buryn nashar sezingenin aıtyp, BMW basshysynyń taıaýda shetelden sapardan oralǵanyn atap ótti, dep jazady RBK.
