BMW basshysy kompanııada 35 jyl jumys istegennen keıin otstavkaǵa ketti
ASTANA. KAZINFORM — BMW nemis avtokontserni basshylyqty ózgertti. 2019 jyldan beri kompanııany basqaryp kele jatqan Olıver Tsıpse bas dırektor qyzmetinen ketti.
BMW kompanııasynyń saıtynda habarlanǵandaı, onyń ornyna Mılan Nedelkovıch taǵaıyndaldy. Basshylyq aýysýy týraly sheshim 2025 jyldyń sońynda-aq resmı túrde jarııalanǵan, sondyqtan bul ózgeris aldyn ala josparlanǵan jáne tosyn jaǵdaısyz júzege asty.
Olıver Tsıpseniń BMW-degi mansaby 1991 jyly taǵylymdamadan (stajırovkadan) bastalǵan. Otyz jyldan astam ýaqyt ishinde ol korporatıvtik mansaptyń barlyq negizgi kezeńderinen ótip, álemdegi eń iri avtoóndirýshilerdiń biriniń basqarý deńgeıine deıin kóterildi.
Onyń bas dırektor retindegi kezeńi álemdik avtomobıl ónerkásibi úshin kúrdeli ýaqytta ótti.
Ol basqarǵan kezeńde BMW COVID-19 pandemııasy, jahandyq jartylaı ótkizgish (chıp) tapshylyǵy jáne naryqtyń elektr kólikterine jedel aýysýy sııaqty qıyndyqtarǵa tap boldy. Soǵan qaramastan, kompanııa turaqty tabysty saqtap qala aldy.
Tsıpseniń jumysynyń negizgi baǵyttarynyń biri — elektr kóligine kóshý strategııasy boldy. Keıbir básekelesterden aıyrmashylyǵy, BMW ishten janý qozǵaltqyshtarynan tolyq bas tartpaı, aralas tásildi tańdady: elektr kólikterin, gıbrıdterdi jáne benzın men dızelmen júretin kólikterdi qatar damytty.
Ol birneshe ret tek elektr kóligine tolyq kóshý ıdeıasyn synǵa alǵan. 2025 jyldyń kókteminde aktsıonerlerge bergen málimdemesinde tek bir tehnologııaǵa súıený sala úshin qate sheshim bolýy múmkin ekenin aıtqan.
Sala ókilderi Tsıpseniń ketýine reaktsııa bildirip úlgerdi. Mercedes-Benz bas dırektory Ola Kallenıýs BMW basshysy men onyń komandasynyń kásibı dıalogy jáne ádil básekelestigin árqashan baǵalaıtynyn atap ótti.
Bıyl aqpan aıynda kabelderdiń durys salynbaýyna baılanysty BMW kontserni búkil álem boıynsha 330 myńǵa jýyq kólikti qaıtaryp alý týraly sheshim qabyldady. Aqaý kóliktiń órtenýine ákelýi múmkin.
