Blýmberg 1,8 mlrd dollaryn jaǵdaıy tómen stýdentterge bóldi
ASTANA. QazAqparat - Burynǵy Nıý-Iork meri ári mıllıarder Maıkl Blýmberg 1,8 mlrd dollaryn qaıyrymdylyq maqsatta AQSh-taǵy Djons Hopkıns atyndaǵy ýnıversıtetke bóldi, dep habarlaıdy QazAqparat.
«Bul qadam qarjylyq jaǵdaıy tómen daryndy jastardyń joǵary oqý ornyna qabyldanýyn kózdeıdi»,- dep málim etti Blýmbergtiń ózi jeksenbi kúni The New York Times gazetinde jaryq kórgen maqalasynda.
«Tek birli-jarymy bolmasa, barlyq kolledjde talapker qujatyn ol túsken jaǵdaıda oqý aqysyn tóleı ala ma, soǵan qaraıdy. Olar tabysy joǵarylarǵa oryn saqtaý úshin áleýmettik jaǵdaıy tómen otbasynan shyqqan talantty úmitkerlerden udaıy bas tartyp otyrady»,- dep túsindirdi 1964 jyly Djons Hopkıns atyndaǵy ýnıversıtetti (ǵylym bakalavri) támamdaǵan mıllıarder.
76 jastaǵy Maıkl Blýmberg 2002- 2013 jyldar aralyǵynda Nıý-Iork meri laýazymynda boldy. Sondaı-aq ol osy attas qarjylyq jańalyqtar agenttiginiń negizin qalaǵan.
Eske sala ketsek, 2017 jyldyń sońynda Blýmberg 50 mln dollaryn balamaly energııa kózine aýysý baǵdarlamasyn júzege asyrýǵa bólgen.
Nıý-Iork eks-meri Amerıkadaǵy eń baı adamdardyń biri. 2018 jylǵy qańtarda Forbes jýrnaly onyń baılyǵyn 50,8 mlrd dollarǵa baǵalady.
