Blue Origin zymyrany synaq kezinde jaryldy: NASA-nyń Aı baǵdarlamasyna qaýip tóndi
ASTANA.KAZINFORM — Florıdadaǵy ǵarysh aılaǵynda New Glenn zymyranynyń jarylýy NASA júzege asyryp jatqan birneshe Aı jobasynyń keshigýine sebep bolýy múmkin. Apat astronavttardy Aıǵa qaıta jiberý josparlaryna ǵana emes, sonymen qatar Amazon kompanııasynyń spýtnıktik jelisin damytý jumystaryna da áser etýi yqtımal, dep habarlaıdy VVS.
28 mamyr kúni New Glenn zymyrany Kennedı ǵarysh ortalyǵy aýmaǵyndaǵy LC-36 ushyrý kesheninde qozǵaltqyshtardy josparly synaý kezinde jaryldy. Kompanııa málimetinshe, qyzmetkerler arasynda zardap shekkender joq. Djeff Bezos bul oqıǵany kompanııa úshin aýyr kún dep atap, ınfraqurylymdy qalpyna keltirip, ushyrý baǵdarlamasyn jalǵastyrýǵa ýáde berdi.
Jarylys saldarynan ushyrý kesheniniń nysandary, sonyń ishinde naızaǵaıdan qorǵaıtyn munaralardyń biri zaqymdanǵan. LC-36 alańy New Glenn zymyranyn ushyrýǵa arnalǵan jalǵyz keshen sanalady.
Sarapshylardyń baǵalaýynsha, keshendi qalpyna keltirý jáne qaıta sertıfıkattaý birneshe aıǵa sozylýy múmkin. Al dál osy New Glenn zymyrany NASA-nyń Aı baǵdarlamasynda mańyzdy ról atqarýy tıis.
Aldaǵy negizgi mıssııalardyń biri — Blue Moon Mark 1 Endurance apparatyn ushyrý. Ol 2026 jyldyń kúzine deıin Aıdyń ońtústik polıýsi mańyna NASA-nyń ǵylymı jabdyqtaryn jetkizýi kerek. Joba bolashaqta adam qatysatyn ekspedıtsııalarǵa daıyndyq kezeńderiniń biri retinde qarastyrylady.
Budan bólek, NASA jaqynda Blue Origin kompanııasymen Aıdyń ońtústik polıýsine eki kommertsııalyq lýnohod jetkizý jóninde 468 mıllıon dollarǵa deıingi kelisimshart jasasty. Bul apparattardy Astrolab jáne Lunar Outpost ázirlep jatyr.
Lýnohodtar Aı betine astronavttar qonǵanǵa deıin jetkizilýi tıis. NASA adamdardy Aıǵa 2028 jylǵa qaraı qaıta jiberýdi josparlap otyr. Alaıda sońǵy apat baǵdarlamanyń merzimderin qaıta qaraýǵa májbúr etýi múmkin.
Jarylys Amazon-nyń buryn Project Kuiper dep atalǵan Leo spýtnıktik jobasyna da áser etti. New Glenn zymyrany orbıtaǵa keńjolaqty ınternetke arnalǵan taǵy 48 spýtnıkti shyǵarýy kerek bolatyn.
Qazirgi ýaqytta Amazon orbıtada 300-den sál astam spýtnıkke ıe bolsa, SpaceX kompanııasynyń Starlink júıesinde 10 myńnan astam apparat jumys istep tur.
Ǵarysh salasyndaǵy básekelestik te kúsheıip keledi. AQSh Aıǵa qaıta ushyp, onyń betinde turaqty baza qurýǵa umtylyp jatqanda, Qytaı óz pılottalatyn Aı baǵdarlamasyn damytyp, ǵaryshkerlerin 2030 jylǵa deıin Aıǵa qondyrýdy josparlap otyr.
Eske sala keteıik, sáýir aıynda «Artemıda-2» mıssııasymen Aıǵa ketken astronavtar Jerge oraldy.
