Bloomberg «Spýtnık V» vaktsınasyn eleýli ǵylymı jetistikterdiń biri dep atady
MÁSKEÝ. TASS-QazAqparat – Reseı koronavırýstyń jańa túrine qarsy álemdegi alǵashqy vaktsınany usyný arqyly keńes ýaqytynan bergi eń eleýli ǵylymı jetistik jasaǵan bolýy múmkin. Mundaı pikirdi senbi kúni Bloomberg jazdy, dep habarlaıdy QazAqparat TASS agenttigine silteme jasap.
Agenttiktiń jazýynsha, The Lancet jýrnaly reseılik «Spýtnıka V» vaktsınasynyń úshinshi klınıkalyq synaǵynyń nátıjesin jarııalady. Oǵan sáıkes reseılik vaktsına amerıkalyq jáne eýropalyq preparattardan esh kem túspeıdi. Oǵan qosa, Qytaı vaktsınasynan anaǵurlyq tıimdirek. Bloomberg málimetine sáıkes, maqala jarııalanǵannan keıin kóptegen elder vaktsınany yqtımal satyp alýshylar retinde «kezekke tura bastaǵan». Kem degende 19 memleket «Spýtnık V»-ny qoldanýdy maquldady, olardyń arasynda Eýroodaq múshesi Majarstan bar. Al Brazılııa men Úndistan bul sheshimge bir qadam jaqyn.
Bloomberg agenttigi Control Risks konsaltıngilik kompanııasynyń dırektory Oksany Antonenkonyń sózin keltirip otyr. Spıkerdiń paıymynsha, koronavırýsqa qarsy kúreste reseılik preparattyń jetistigi Máskeýdiń, ásirese Latyn Amerıkada geosaıası yqpalyn arttyrýy múmkin.
Eýropalyq retteýshi organdar da Germanııanyń protsedýrany jedeldetýge kómek kórsetetindigi týraly ýádesinen keıin, «Spýtnıka V»-ǵa ótinim berýdi qarastyra bastaǵan. Agenttikke The Lancet-tiń bas redaktory Rıchard Horton málim etkendeı, bul másele birneshe aıǵa sozylýy yqtımal. Sebebi preparattar jóninde egjeı-tegjeıli derekterdi usyný qajet etiledi. «Shynymen de, reseılik vaktsına keńinen qoldanyla bastaıdy dep oılaımyn, biraq bul tez bolmaıdy», - dedi ol.
Buǵan deıin The Lancet «Spýtnık V» vaktsınasynyń úshinshi klınıkalyq synaǵynyń nátıjelerin jarııalaǵan bolatyn. Oǵan sáıkes, preparattyń tıimdiligi 91,6% quraıdy. 60 jastan asqan eriktiler arasyndaǵy tıimdilik - 91,8%. «Spýtnık V»-men vaktsınalanǵannan keıin eriktilerdiń 98% koronavırýsqa antıdeneler paıda bolǵan.
Eske salaıyq, 1 aqpannan bastap Qazaqstanda Reseıde shyǵarylǵan «Spýtnık V» vaktsınasyn paıdalana otyryp, KVI-ǵa qarsy vaktsınatsııa bastalady. Vaktsına erikti túrde jáne tegin salynady.
