Bloomberg Saýd Arabııasyndaǵy Reseımen kelissózderde AQSh ókilderin atady

ASTANA. KAZINFORM –  Ýıtkoff pen Ýolts AQSh-tyń Saýd Arabııasyndaǵy Reseımen kelissózderdegi ókilderi bolady, dep habarlaıdy TASS.

Reseı men AQSh ókilderi arasyndaǵy aldaǵy kelissózderde amerıkalyq taraptan jetekshi ról AQSh prezıdenti Donald Tramptyń Taıaý Shyǵys boıynsha arnaıy ókili Stıven Ýıtkoffqa jáne ulttyq qaýipsizdik jónindegi kómekshisi Maık Ýoltsqa berilmek. Bul týraly Bloomberg agenttigi derekkózderge silteme jasap habarlady.

Agenttik bul jaǵdaıǵa baılanysty AQSh prezıdentiniń Ýkraına jáne Reseı boıynsha arnaıy ókili Kıt Kellogtyń kelissózderdegi róli qandaı bolatyny týraly suraq týyndaıtynyn atap ótti.

Bloomberg derekterine súıensek, Reseı men AQSh arasyndaǵy baılanystar sońǵy aptada, ásirese AQSh vıtse-prezıdenti Djeı Dı Venstiń Mıýnhen qaýipsizdik konferentsııasyndaǵy qatal málimdemesinen keıin, aıtarlyqtaı kúsheıgen.

Agenttiktiń málimetinshe, AQSh pen Reseıdiń joǵary laýazymdy resmı tulǵalarynyń kezdesýi kelesi aptada Saýd Arabııasynda ótýi múmkin. Bloomberg bul kezdesýdiń eki el basshylarynyń yqtımal sammıtine daıyndyqqa baǵyttalǵanyn atap ótedi.

Eske salsaq Tramptyń Reseı prezıdenti Vladımır Pýtınmen alǵashqy kezdesýi Saýd Arabııasynda ótetini týraly jazǵan edik.