Bloomberg Qazaqstandy 2026 jylǵy álemdegi top-25 týrıstik baǵyt qataryna qosty
ASTANA. KAZINFORM — Qazaqstan álemdik týrıstik kartadaǵy óz pozıtsııasyn nyǵaıtyp keledi. Bedeldi halyqaralyq Bloomberg basylymy Almaty qalasyn 2026 jyly barýǵa turarlyq álemdegi eń úzdik 25 týrıstik baǵyttyń tizimine engizdi. Bul týraly «Kazakh Tourism» UK» málim etti.
Bloomberg Almaty qalasynyń týrıstik tartymdylyǵynyń turaqty ósimin jáne onyń jyl boıy suranysqa ıe baǵyt ekenine nazar aýdarady. Onyń ishinde qalalyq mádenıet, baı tarıhı mura, gastronomııa jáne tabıǵı landshafttarǵa jaqyndyǵy kórsetiledi.
— Ortalyq Azııa dalasynda shyǵarmashylyq energııa qaınap jatyr. Eldiń eń iri qalasynyń tanymaldyǵy artyp keledi jáne 2025 jyldyń 9 aıynda rekordtyq 2,5 mıllıon adam bolǵan. Keıbiri altyn kúmbezdi Zenkov soboryn, dámdeýishter, bal jáne jylqy etinen jasalǵan shujyqtar satylatyn Jasyl bazardyń saýda qatarlaryn kórý úshin keledi. Basqalary qalanyń beton qurylysy artynda menmundalaıtyn Іle Alataýy taýlaryndaǵy Alpi kólderi men taý shańǵysy betkeılerine qaraı bet aldy. Mádenıetke salynǵan iri ınvestıtsııalardyń arqasynda bul sandar ósedi, — dep jazady basylym.
Bloomberg Almatydaǵy demalystyń maýsymdyq ártúrliligine erekshe nazar aýdarady. Qys mezgilinde týrısterge Shymbulaqtyń taý betkeılerine barý usynylady.
— Bloomberg nusqasy boıynsha Qazaqstannyń álemdegi eń úzdik 25 týrıstik baǵyttyń qataryna engizilýi — mańyzdy halyqaralyq moıyndaý jáne qalanyń tanymaldyǵyn arttyrý boıynsha Visit Almaty jumysynyń nátıjesi bolyp tabylady. Bul eldiń jahandyq týrıstik naryqtaǵy básekege qabilettiliginiń artqanyn jáne halyqaralyq aýdıtorııanyń Qazaqstanǵa qyzyǵýshylyǵynyń artqanyn rastaıdy. Sońǵy jyldary elimiz jetekshi álemdik BAQ reıtıngterinde jıi enýde, — dep atap ótti «Kazakh Tourism» UK» AQ Basqarma tóraǵasynyń m. a. Danıel Serjanuly.
Bloomberg jyl saıynǵy reıtıngi týrıstik trendterdi saraptaý, sala jańalyqtaryn týrızm salasyndaǵy sarapshylarmen taldaýy negizinde qalyptastyrylady.
Buǵan deıin habarlanǵandaı, Shymbulaq pen Oı-Qaraǵaı kýrorttary aspaly jol arqyly biriktiriledi.