Bloomberg: Qazaqstan syn-qaterdi óz paıdasyna jarata bilýdi úırendi
ASTANA.KAZINFORM - Blýmbergtiń yqpaldy amerıkalyq basylymy Qazaqstan týraly iri analıtıkalyq maqala jarııalap, eldi jyldam ózgeretin jahandyq jaǵdaılarǵa beıimdelýdiń eń sátti úlgileriniń biri dep atady.
Maqala avtorlary sońǵy jyldary Qazaqstan halyqaralyq týrbýlenttilik jaǵdaıynda turaqtylyqty saqtap qana qoımaı, sonymen qatar Eýrazııanyń mańyzdy ekonomıkalyq, logıstıkalyq jáne tehnologııalyq haby retindegi óz ornyn nyǵaıta alǵanyn atap ótedi.
Bloomberg osy ózgeristerdiń sımvoly retinde Astanany ataıdy. Basylym shırek ǵasyr buryn qazirgi astana jazyq daladaǵy shaǵyn qala bolǵanyn, biraq búginde ol tanymal sáýleti men aýqymdy ınfraqurylymdyq jobalary bar zamanaýı megapolıske aınalǵanyn eske salady.
- Astana eń aldymen maǵynaly sáýletimen qyzyqty, - delingen Bloomberg maqalasynda.
Alaıda, avtorlar eldiń sáýletinen góri onyń jańa geoekonomıkalyq róline nazar aýdarady. Bloomberg málimeti boıynsha, Qazaqstan álemdegi eń iri naryqtar arasyndaǵy baılanystyrýshy býyn retinde qyzmet etip keledi. Basylymda Qytaı men Eýropa arasyndaǵy negizgi júk tasymaldaý baǵytyna aınalyp kele jatqan Transkaspıı halyqaralyq kólik baǵyty nemese Orta dáliz jaıy aıtylady.
Basylymda jahandyq logıstıkadaǵy ózgerister aıasynda Qazaqstan óziniń geografııalyq ornalasýyn strategııalyq artyqshylyqqa aınaldyryp, Eýrazııa úshin tranzıttik hab retindegi ornyn aıtarlyqtaı nyǵaıta alǵany da aıtylǵan.
- El Qytaı, Reseı jáne Eýropa arasyndaǵy ornyn ekonomıkalyq artyqshylyq retinde paıdalanyp otyr, - dep jazady Bloomberg.
Maqalada sondaı-aq eldiń óz damýy úshin jahandyq qıyndyqtardy paıdalaný múmkindigi de qarastyrylǵan. Avtorlar pikirinshe, Qazaqstan halyqaralyq naryqtardaǵy ózgeristerge, energetıkalyq daǵdarystarǵa jáne jetkizý tizbekterin qaıta qurylymdaýǵa beıimdelip, saýda men ınvestıtsııa úshin jańa múmkindikter ashty.
Bloomberg eldiń tsıfrlyq transformatsııasyna basa nazar aýdarady. Basylym Qazaqstandy aımaqtaǵy tsıfrlandyrý salasyndaǵy kóshbasshylardyń biri dep ataıdy. Avtorlar elektrondyq úkimettiń damýynyń joǵary deńgeıin jáne memlekettik basqarýda tsıfrlyq qyzmetterdi belsendi engizýdi atap ótedi. Basylymdy jasandy ıntellekt salasyndaǵy Qazaqstannyń jospary erekshe qyzyqtyrdy. Jasandy ıntellekttiń damýy ulttyq basymdyqqa aınalǵany jáne eldiń jańa tehnologııalyq dáýirge mamandardy daıarlaýǵa basa nazar aýdaryp otyrǵany atap ótiledi.
- Qazaqstan jasandy ıntellekt pen tsıfrlyq ınnovatsııalar úshin aımaqtyq hab bolýǵa umtylady, - dep jazady avtorlar.
Bloomberg halyqaralyq ınvestorlardyń nazaryn aýdaratyn faktor retinde Astana habyn, derekter ortalyǵyn damytýdy, mańyzdy mıneraldy jobalardy jáne Astana halyqaralyq qarjy ortalyǵyn atady.
Basylymda eldiń demografııalyq áleýeti de tilge tıek etiledi. Qazaqstan halqynyń jartysyna jýyǵy 30 jasqa tolmaǵan, bul avtorlardyń pikirinshe, ınnovatsııalyq ekonomıka men tehnologııalyq kásipkerliktiń odan ári damýyna negiz qalaıdy.
Jalpy alǵanda, Bloomberg Qazaqstandy shıkizatqa negizdelgen ekonomıkanyń dástúrli qabyldaýynan tysqary shyǵýǵa tyrysatyn jáne tehnologııaǵa, logıstıkaǵa, adamı kapıtalǵa jáne halyqaralyq yntymaqtastyqqa basa nazar aýdaratyn el retinde sıpattaıdy.
Basylymnyń negizgi qorytyndysy - Qazaqstan álemdik bıznes qaýymdastyǵy tarapynan shetkeri naryq retinde emes, ekonomıkalyq ósimniń táýelsiz ortalyǵy jáne Eýrazııanyń jańa arhıtektýrasyn qalyptastyratyn protsesterdiń negizgi qatysýshysy retinde qarastyrylǵan.
