Bloomberg álemniń eń baı adamdarynyń reıtıngisin jarııalady
ASTANA. QazAqparat - Bloomberg agenttigi álemniń eń baı adamdarynyń dástúrli jylsaıynǵy reıtıngisin jarııalady, dep habarlady Informıng.rý.
Bıylǵy jyly kóshbasshylar úshtiginen ınvestor Ýorren Baffet shyǵyp qaldy. Endi Bloomberg nusqasy boıynsha álemniń eń baı adamdarynyń reıtıngisin Microsoft korporatsııasynyń negizin qalaýshy Bıll Geıts bastady. Onyń dáýletin sarapshylar 89 mıllıard dollarǵa baǵalady.
Reıtıngidegi ekinshi orynǵa Inditex kompanııasynyń negizin qalaýshy - kásipker Amansıo Ortega shyqty. Onyń aktıvteri 73 mıllıard dollarǵa baǵalanyp otyr.
Kóshbasshylar úshtigin Amazon ınternet-reteılerdiń negizin qalaýshy Djeffý Bezos tuıyqtady. Onyń dáýleti 60,5 mıllıard dollardy quraıdy. Amazon kompanııasy kóktemde birinshi toqsan qorytyndysymen satý kólemi 28 paıyzǵa óskeni jáne rekordttyq tabysqa jetkeni týraly esep berdi, al onyń aktsııasy qystan beri 54 paıyzǵa qymbattady. Sonyń arqasynda Bezostyń baılyǵy 5,4 mıllıard dollarǵa artty. Bul amerıkandyq olıgarhtyń tanymal ınvestor Ýorren Baffetti úshinshi orynnan tómen jyljytýyna múmkindik berdi.
Al Baffet basqaratyn Berkshire Hathaway kompanııasynyń aktsııasy 9,4 paıyzǵa qymbattap, 2,7 mıllıard dollarǵa ulǵaıdy. Alaıda Baffet dáýletin qaıyrymdylyq sharalaryna jumsap, 2,9 mıllıard dollarǵa shyǵyndaldy. Bloomberg Billionaires Index taldamashylarynyń esepteýinshe, onyń baılyǵy Amazon kompanııasynyń tabysynan 32 mıllıon dollarǵa azaıdy. Sóıtip, qaıyrymdylyq qyzmetiniń saldarynan ol álemdegi eń baı adamdar úshtiginen keıinge ysyryldy.
