Blokposttardan kimder óte alady
NUR-SULTAN. QazAqparat – QR Іshki ister mınıstri Erlan Turǵymbaev blokposttardan kimder kedergisiz óte alatynyn aıtty, dep habarlaıdy QazAqparat tilshisi.
«Aqmola jáne Almaty oblystarynyń aýmaǵynda postqa jetpes buryn qosymsha avtopatrýl ekıpajdary qoıylady. Olar ótkizý pýnkterinde kólikterdiń kóp jınalyp qalmaýyna baılanysty túsindirý jumystaryn júrgizedi. Karantındik shekteýler kelesi azamattarǵa qoldanylmaıdy. Olar: buryn shyǵyp ketken Nur-Sultan jáne Almaty qalalarynyń turǵyndary. Biraq olar 22 naýryz kúni túngi saǵat 00.00 ýaqytyna deıin oralýy kerek. Sonymen birge shetelden Qazaqstanǵa qaıtqan azamattarǵa atalmysh shekteý qoıylmaıdy. Basqa óńirlerdiń turǵyndary 22 naýryz kúni saǵat 00.00 ýaqytyna deıin shyǵyp ketýi kerek. Tranzıtpen nemese áýe kóligimen ketýge nıetti azamattarǵa da shekteý engizilmeıdi. Shetelge emdelýge ketip bara jatqan azamattarǵa da shekteý bolmaıdy. Biraq olarda rastaıtyn qujat bolýy tıis»- dedi ol «Habar 24» arnasynan tikeleı efırden sóılegen sózinde.
Sonymen qatar, sheteldik memleketterdiń dıplomatııalyq qyzmetiniń personaldary men olardyń otbasy múshelerine de shekteý qoıylmaıdy.
«Poıyz jáne lokomotıv brıgadalarynyń múshelerine, áýe kemeleriniń ekıpaj múshelerine, halyqaralyq baǵytta júretin júk kólikteriniń júrgizýshilerine, qala mańynda turyp, Nur-Sultan men Almatyda jumys isteıtin turǵyndarǵa, sondaı-aq atalǵan qalalarda turyp Almaty men Aqmola oblysynda jumys isteıtin adamdarǵa da shekteý engizilmeıdi», - dedi mınıstr.
