Blokpostaǵy keptelis búgin-erteń sheshiledi – Almaty ákimdigi
ALMATY. QazAqparat – Almaty ákiminiń birinshi orynbasary Erlan Qojaǵapanov qalaǵa kireberistegi keptelisterge qatysty túsinik berdi, dep habarlaıdy QazAqparat tilshisi.
«Qazir qalada 700 polıtsııa qyzmetkeri 22 blokposta 2-3 aýysymmen jumys istep jatyr. Bir blokposqa 10 adamnan keledi. Alaıda, biz blokpostyń perımetrin de eskerýimiz kerek. Ol terrıtorııa da baqylaýdy qajet etedi. Qazir karantın sharalarynyń báseńsýine baılanysty qalaǵa kiretin-shyǵatyn kólikterdiń sany artyp keledi», - dedi Erlan Qojaǵapanov.
Onyń aıtýynsha, qazir ár blokposta polıtsııa qyzmetkerleriniń qolyna beriletin planshetter sany kóbeıgen.
«Biz 1-2 kúnde osy máseleni sheshemiz», - dedi ol.
Buǵan deıin karantın rejıminiń saqtalýyn baqylaıtyn polıtsııa qyzmetkerleriniń sany artqanyn jazǵan bolatynbyz.
