Blokcheın men krıptoanalız: polıtsııa jumysyna jańa tehnologııalar engizilmek
QYZYLORDA. KAZINFORM – Qyzylorda qalasynda ishki ister organdaryndaǵy tsıfrlyq krımınalıstıka máselelerine arnalǵan óńiraralyq forým ótti.
Forým Memleket basshysy Qasym-Jomart Toqaevtyń «Jasandy ıntellekt dáýirindegi Qazaqstan: ózekti máseleler jáne ony túbegeıli tsıfrlyq ózgerister arqyly sheshý» atty Joldaýyn iske asyrý aıasynda uıymdastyryldy.
Negizgi maqsat – qylmystardy ashý men tergeý barysynda polıtsııa qyzmetine zamanaýı tsıfrlyq jáne ınnovatsııalyq tehnologııalardy engizý. Forým Qyzylorda oblysy polıtsııa departamentiniń krımınalıstıkalyq polıgonynda ótti.
Onda krıptovalıýta aktıvterin shyǵarý tetikteri jan-jaqty taldanyp, blokcheın tehnologııasy men krıptoanalızdiń negizderi qarastyryldy. Bul tásilder tsıfrlyq aktıvterdiń qozǵalysyn baqylaýǵa jáne qylmystyq ister boıynsha dáleldemeler bazasyn nyǵaıtýǵa múmkindik beredi.
Sonymen qatar zamanaýı krımınalıstıkalyq tehnıkanyń jańa úlgileri men tsıfrlyq sheshimder tanystyrylyp, praktıkalyq sheberlik sabaqtary ótkizildi.
Іshki ister mınıstriniń orynbasary S. Adılov krımınalıstıkalyq qyzmettiń jetistikterine toqtalyp, qylmystardy ashýda zamanaýı tehnıkanyń róline, úzdik tájirıbelerdi qoldanýdyń mańyzdylyǵyna jáne tsıfrlyq krımınalıstıkanyń ishki ister organdary qyzmetindegi erekshe ornyna nazar aýdardy.
Aıta ketý kerek, Qyzylorda oblysy polıtsııa departamentinde zamanaýı tehnıkalyq quraldarmen jáne oqý-jattyǵý alańdarymen jabdyqtalǵan, elimizdegi eń ozyq krımınalıstıkalyq polıgondardyń biri jumys isteıdi.
Aıta keteıik, Memleket basshysy bıylǵy Joldaýynda: «Zań jáne tártip» — memleketimizdiń myzǵymas tuǵyry. Qoǵamda osy qaǵıdany túbegeıli ornyqtyrý úshin barlyq quzyrly organdar arasynda ortaq kózqaras pen ortaq ustanym bolýǵa tıis. Bul — eń aldymen, eshqandaı quqyq buzýshylyqqa jol bermeý qaǵıdasy, ıaǵnı kez kelgen zańsyzdyqqa qarsy turý degen ustanym. Sondyqtan memlekettik organdardyń osy baǵyttaǵy jumysyn barynsha qoldaý qajet. Sonda ǵana elimizde quqyq buzýshylyqqa, ozbyrlyq pen zorlyq-zombylyqqa qarsy sana-sezim qalyptasady, qoǵamǵa jat kez kelgen áreketke tózbeýshilik paıda bolady, — degen edi.